गेल्या काही दिवसांपासून निलेश राणे यांच्या गुहागरमधील सभेची जोरदार जाहिरातबाजी केली जात होती. सोशल मीडियावर या सभेचे टिझर प्रदर्शित केले जात होते. त्यामुळे ठाकरे गट आणि भाजपच्या कार्यकर्त्यांमध्ये काहीतरी होऊ शकते, अशी शक्यता होती. त्यादृष्टीने या भागात पोलीस कुमकही तैनात करण्यात आली होती. भास्कर जाधव आणि नारायण राणे यांच्यात जुने वैर आहे. त्यामुळे आज राडा होण्याची शक्यता असूनही पोलिसांनी चिपळूणमध्ये पुरेशी खबरदारी घेतली. पोलिसांनी भास्कर जाधव यांच्या कार्यालयासमोरच निलेश राणे यांचे स्वागत करण्याची परवानगी भाजप कार्यकर्त्यांना दिली. त्यामुळेच भास्कर जाधव गटाचे कार्यकर्ते आक्रमक झाले आणि त्याचे पर्यवसन राड्यात झाले, असे सांगितले जात आहे.
गुहागर-भाजप नेते आणि माजी खासदार नीलेश राणे यांच्या गाडीवर दगडफेक झाली. शिवसेना ठाकरे गटाचे नेते भास्कर जाधव यांच्या कार्यालयासमोर नीलेश राणे यांचा ताफा आला. जाधवांच्या कार्यालयाबाहेर राणेंच्या कार्यकर्त्यांकडून त्यांचा जंगी सत्कार करण्यात येणार होता. मात्र याच वेळी जाधव आणि राणे यांच्या कार्यकर्त्यांमध्ये राडा झाला. यावेळी तणावाची परिस्थिती निर्माण झाली असून कार्यकर्त्यांकडून दगडफेकही करण्यात आली.
नीलेश राणे यांची आज गुहागरमध्ये जाहीर सभा होत आहे. त्या पार्श्वभूमीवर गुहागरमध्ये दोन्ही गटाचे कार्यकर्ते आमने सामने आले. या परिसरात प्रचंड तणाव आहे, त्यामुळे पोलिसांनी अश्रूधुराच्या कांड्या फोडून जमावाला हटवण्याचा प्रयत्न केला.
नीलेश राणे यांची भास्कर जाधवांच्या गुहागर मतदारसंघात तळी येथे सायंकाळी 5 वाजता जाहीर सभा आयोजित करण्यात आली होती. भास्कर जाधव यांनी उद्धव ठाकरेंच्या कोकण दौऱ्यावेळी नारायण राणे पिता पुत्रांवर तुफान टीका केली होती. त्याला उत्तर म्हणून नीलेश राणे यांनी गुहागमध्ये आज सभेचं आयोजन केलं होतं.
आमदार भास्कर जाधव म्हणाले की, गुहागरमध्ये टीझर व्हायरल करून लोकांना उकसवण्याचा प्रयत्न केला होता. गुन्ह्याला माफी नाही, हिशेब चुकता करणार, अशा आशयाचे बॅनरही लावण्यात आले होते. मात्र आम्ही कुणाच्याही झेंड्याला बॅनरला हात लावायचा नाही, अशा सूचना कार्यकर्त्यांना दिल्या होत्या. त्यामुळे आम्ही कुणाही त्यांच्या झेंड्याला हात लावला नाही. हीच आमच्या गुहागरची संस्कृती असल्याचेही जाधव म्हणाले.
जाधव पुढे म्हणाले की, ते जाणीवपूर्वक चिपळूणमधून आले. त्यांना समर्थकांच्या हातून सत्कार करायचा होता. त्यामुळे मी पोलिसांना आधीच अलर्ट केले होते. त्यांचा सत्कार माझ्या कार्यालयासमोर करण्यात आला. त्यांच्या स्वागतासाठी क्रेन लावली होती. ती जाणीवपूर्वक माझ्या ऑफिससमोर आणण्यात आली.
सर्वांनी शांततेने मागे फिरण्याची मी मागणी केली होती. त्याचवेळी सत्कार करण्यात आला आणि आतषबाजी करण्यात आली. त्यानंतर त्यांचे समर्थक पुन्हा आमच्यापुढे नाचत गात आले. आमच्या समर्थकांना उकसवण्याचा प्रयत्न केला. त्यानंतर दोन्ही बाजूकडून दगडफेक करण्यात आल्याचं जाधवांनी सांगितलं.
जाणीवपूर्वक हातवारे करून त्यांनीच दगडफेक केली. आमच्याकडुनही दगडफेक झाल्याचंही भास्कर जाधव म्हणाले. तुम्ही त्यांना मिरवणूक का काढू दिली, असा सवाल पोलिसांना जाधवांनी केला.
दगडफेक होताच निलेश राणे संतापून गाडीतून खाली उतरले
निलेश राणे यांच्या गाड्यांचा ताफा चिपळूणमध्ये भास्कर जाधव यांच्या कार्यालयाच्या परिसरात आला. यावेळी दोन्ही गटाच्या कार्यकर्त्यांमध्ये बाचाबाची आणि मारामारी झाली. भास्कर जाधव यांच्या कार्यकर्त्यांनी दगडफेक सुरु केल्यानंतर भाजपचे कार्यकर्तेही आक्रमक झाले. यादरम्यान एक दगड निलेश राणे यांच्या गाडीवर पडला. ठाकरे गटाच्या कार्यकर्त्यांनी दगडफेक केल्याने निलेश राणे संतापले. त्यांनी गाडीतून खाली उतरून भास्कर जाधव यांच्या कार्यकर्त्यांच्या अंगावर जाण्याचा प्रयत्न केला. त्यामुळे मोठा राडा होण्याची चिन्हे दिसत होती. अखेर कार्यकर्त्यांनी समजूत घातल्यानंतर निलेश राणे गुहागरमध्ये सभेच्या दिशेने रवाना झाले. मात्र, आता सभा संपल्यानंतर निलेश राणे पुन्हा याठिकाणी येऊ शकतात. त्यामुळे आज रात्री चिपळूणमध्ये पुन्हा राडा होण्याची शक्यता आहे.
