कुटुंबाशी फोनवर संवाद साधत दिला धीर
पुणे.दि.१३: पुण्यातील बोटॅनिकल सर्व्हे ऑफ इंडिया (बीएसआय) या केंद्र सरकारच्या संस्थेत पीएचडी संशोधन करणाऱ्या ३० वर्षीय विद्यार्थिनीने लैंगिक छळ आणि मानसिक त्रासाला कंटाळून गळफास घेऊन आत्महत्या केल्याची धक्कादायक घटना समोर आली आहे. या प्रकरणात संस्थेचे सहाय्यक संचालक डॉ. ए. बिन्नियमिन (५०) यांना पिंपरी-चिंचवड (भोसरी एमआयडीसी) पोलिसांनी अटक केली असून, त्याने लैंगिक छळ केल्याची कबुलीही दिली आहे.
दरम्यान, विधानपरिषद उपसभापती व शिवसेना नेत्या डॉ. नीलम गोऱ्हे यांनी या प्रकरणाची तातडीने दखल घेतली आहे. त्यांनी विद्यार्थिनीच्या आई-वडिलांशी फोनवरून सविस्तर संवाद साधला. डॉ. गोऱ्हे म्हणाल्या, “मी स्वतः अतिशय व्यथित झाले आहे. मुलीला संशोधक बनवण्यासाठी पालक आयुष्य समर्पित करतात आणि अशा वेळेला मुलींच्या वाट्याला या गोष्टी येत असतील तर खरोखर असे नराधम कुठल्याच प्रकारच्या नोकरीत राहण्याच्या लायकीचे नाहीत.”
या विद्यार्थिनीला, डॉ. बिन्नियमिनकडून अनैतिक वर्तन, लैंगिक छळ, अंगावर हात टाकणे आणि मानसिक त्रास दिल्याने तीला मानसिक धक्का बसला व त्यामुळे तिने आत्महत्या केली आहे. तसेच तिचा संशोधनाचा डेटा वारंवार डिलीट करण्यात येत होता, असे कुटुंबीयांनी सांगितले. पिंपरी-चिंचवड पोलिसांनी या प्रकरणी कुटुंबीयांना पूर्ण सहकार्य दिल्याचे त्यांनी डॉ. गोऱ्हे यांना सांगितले.
डॉ. गोऱ्हे यांनी यावरून शैक्षणिक संस्थांमधील लैंगिक शोषण रोखण्यासाठीच्या समित्या कितपत कार्यान्वित आहेत, याची तपासणी करण्याची गरज व्यक्त केली. “केंद्र सरकारची जरी ही संस्था असली तरी पुणे जिल्हाधिकाऱ्यांनी, उच्च शिक्षण विभागाने, महिला-बालविकास विभागाने वारंवार जीआर काढून स्पष्ट केले आहे की प्रत्येक शैक्षणिक संस्थेत स्थानिक तक्रार समित्या (लोकल कंप्लेंट कमिटी) असल्या पाहिजेत. परंतु त्या समित्यांकडे माहिती पोहोचते की नाही, याची तपासणी होत नाही. विद्यार्थिनींपर्यंत जागृती आणि माहिती पोहोचवण्यातही कमतरता दिसते,” असे त्यांनी सांगितले. ही विद्यार्थिनी केंद्र सरकारच्या संस्था सुरक्षित आहेत म्हणूनच इथे पीएचडीसाठी आली होती. पण घडलेला प्रकार अतिशय निंदनीय असल्याचे डॉ गोऱ्हे यांनी सांगितले.
वनस्पती शास्त्र संशोधन संस्था , केंद्र सरकार यांनी आरोपीवर तात्काळ कारवाई करून त्याला बडतर्फ करावे, यासाठी पाठपुरावा करणार असल्याचे डॉ. गोऱ्हे यांनी सांगितले. तसेच पीडित कुटुंबाला सक्षम सरकारी वकील मिळवून देण्यासाठी आमचा प्रयत्न राहील, असे त्यांनी आश्वासन दिले.
