नवी दिल्ली:- सरहद पुणे आयोजित महाराष्ट्र सदन, नवी दिल्ली आणि मराठी भाषा विभाग, महाराष्ट्र शासन यांचे सहकार्याने दिल्ली येथे ११ व १२ एप्रिल २०२६ रोजी होणाऱ्या पहिल्या महिला प्रशासकीय महिला अधिकाऱ्यांच्या मराठी साहित्य संमेलनानिमित्त तयार करण्यात आलेल्या ‘सौदमिनी’ या स्मरणिकेचे प्रकाशन १० एप्रिल २०२६ रोजी सायंकाळी दिल्ली येथे उपराष्ट्रपती मा. सी. पी. राधाकृष्णन यांच्या हस्ते त्यांच्या निवासस्थानी करण्यात येणार आहे. या स्मरणिकेचे संपादन ज्येष्ठ पत्रकार ऋता बावडेकर यांनी केले असून पत्रकार प्राजक्ता ढेकळे यांनी संपादन सहाय्य केले आहे.
‘सौदामिनी’ या स्मरणिकेत विविध महिला प्रशासकीय अधिकाऱ्यांचे लेख असून त्यांनी आपल्या क्षेत्रातील अनुभव, आपण केलेले प्रयत्न, तसेच कुटुंब आणि कर्तव्य याचा समतोल कसा साधला अशा विविध विषयांवर लेखन केले आहे. प्रशासकीय अधिकाऱ्यांचे वेगळेच विश्व यातून कळते.
या संमेलनाला उपमुख्यमंत्री एकनाथ शिंदे यांनी लेखातून शुभेच्छा दिल्या आहेत. तसेच महाराष्ट्रात महिला धोरण राबविणारे ज्येष्ठ नेते शरद पवार यांची सविस्तर मुलाखत आहे. याशिवाय संमेलनाच्या अध्यक्ष लीना मेहेंदळे, निमंत्रक आर. विमला, स्वागताध्यक्ष सुप्रिया देवस्थळी यांच्यासह अनेक अधिकाऱ्यांचे वाचनीय लेखन यात आहे. अशी माहिती लेशपाल जवळगे यांनी दिल्ली येथे प्रसिद्धी पत्रकाद्वारे दिली.
