इराण आणि अमेरिका 2 आठवड्यांच्या युद्धविरामावर सहमत झाले आहेत. अमेरिकेचे राष्ट्राध्यक्ष डोनाल्ड ट्रम्प यांनी इराणला 2 आठवड्यांसाठी हल्ले थांबवण्याची घोषणा केली आहे. त्यांनी सोशल मीडियावर सांगितले,
इराणकडून ताबडतोब होर्मुझ सामुद्रधुनी उघडण्याच्या अटीवर बॉम्बफेक आणि हल्ले दोन आठवड्यांसाठी स्थगित करण्यास मी सहमत आहे.
ट्रम्प म्हणाले, “मी हा निर्णय पाकिस्तानचे पंतप्रधान शहबाज शरीफ आणि लष्करप्रमुख आसिम मुनीर यांच्या विनंतीनंतर घेतला आहे. आम्हाला इराणकडून 10 मुद्द्यांचा प्रस्ताव मिळाला आहे. दोन्ही देशांमधील सर्व वादग्रस्त मुद्द्यांवर सहमती झाली आहे. पुढील दोन आठवडे कराराला अंतिम रूप देण्यासाठी आणि त्याची अंमलबजावणी करण्यासाठी आवश्यक असतील.”
इराणच्या सर्वोच्च राष्ट्रीय सुरक्षा परिषदेने सांगितले की, पुढील चर्चा 10 एप्रिलपासून पाकिस्तानची राजधानी इस्लामाबादमध्ये होईल. इराणने दोन आठवड्यांसाठी होर्मुझ उघडल्याची माहिती दिली आणि आपल्या नागरिकांना सांगितले की, या काळात राष्ट्रीय एकता टिकवून ठेवावी आणि विजयाचा उत्सव पूर्ण ताकदीने साजरा करत राहावे.
इराणच्या सर्वोच्च नेत्याने हल्ले थांबवण्याचे आदेश दिले
शस्त्रसंधी करारानंतर इराणने हल्ले थांबवण्याचे आदेश दिले आहेत. ट्रम्प यांच्या शस्त्रसंधीच्या घोषणेनंतर सुमारे दोन तासांनी इराणच्या सर्वोच्च नेत्याने सर्व लष्करी तुकड्यांना गोळीबार थांबवण्याचे आदेश दिले.
इराणच्या सरकारी वृत्तवाहिनी आयआरआयबीवर वाचून दाखवलेल्या एका निवेदनात म्हटले आहे की, सर्व लष्करी शाखांनी सर्वोच्च नेत्यांच्या निर्देशांचे पालन करावे आणि तात्काळ गोळीबार थांबवावा.
तथापि, या निवेदनात असेही म्हटले आहे की हा संघर्षाचा शेवट नसून एक तात्पुरता उपाय आहे. तरीही, सर्व लष्करी तुकड्यांना या आदेशाचे काटेकोरपणे पालन करण्याचे निर्देश देण्यात आले आहेत.
ट्रम्प यांनी इराणच्या परराष्ट्र मंत्र्यांचे शस्त्रसंधीविषयक निवेदन शेअर केले
ट्रम्प यांनी त्यांच्या ‘ट्रुथ सोशल’ या सोशल मीडिया प्लॅटफॉर्मवर इराणचे परराष्ट्र मंत्री अब्बास अराघची यांचे एक निवेदन शेअर केले, ज्यामध्ये दोन आठवड्यांच्या शस्त्रसंधी कराराला आणि होर्मुझची सामुद्रधुनी खुली झाल्याच्या घोषणेची माहिती देण्यात आली आहे.
आपल्या निवेदनात, अराघची यांनी पाकिस्तान आणि तेथील नेतृत्वाचे आभार मानले आणि म्हटले की, या प्रदेशातील संघर्ष संपवण्यात त्यांनी महत्त्वाची भूमिका बजावली. ते म्हणाले की, जर इराणवरील हल्ले थांबले, तर त्यांचे सशस्त्र दलदेखील आपल्या बचावात्मक कारवाया थांबवतील.
अमेरिकेने इराणविरुद्धच्या सर्व आक्रमक लष्करी कारवाया थांबवल्या आहेत
अमेरिकेने इराणविरुद्धच्या सर्व आक्रमक लष्करी कारवाया स्थगित केल्या आहेत. नाव न सांगण्याच्या अटीवर एका अधिकाऱ्याने सांगितले की, आक्रमक कारवाया पूर्णपणे थांबवण्यात आल्या आहेत, मात्र बचावात्मक कारवाया आणि सुरक्षा उपाय सुरूच राहतील.
इराणनं दिलेला 10 अटींचा मसुदा मान्य करण्यासारखा असल्याचं डोनाल्ड ट्रम्प यांनी म्हटलं. तर होर्मुझची सामुद्रधुनी खुली करण्याची अट अमेरिकेने घातली होती. या अटीला इराणनेदेखील सकारात्मक प्रतिसाद दिला. इराण हॉर्मुझ पूर्णपणे आणि लगेच खुलं करायला तयार झाल्याचंही ट्रम्प यांनी सांगितलं आहे. अमेरिका आणि इराण यांच्यातील युद्ध थांबवण्यात चीन आणि पाकिस्तानने मध्यस्थी केल्याचं बोललं जात आहे. तसेच इराणने पाकिस्तानमार्फत अमेरिकेकडे एक सविस्तर प्रस्ताव पाठवला आहे. जो आता अमेरिकन बाजू वाटाघाटीसाठी पुढे करणार आहेत. सध्या अमेरिका आणि इराण यांच्यात दोन आठवड्यांसाठी शस्त्रसंधी झाली असून 10 एप्रिल रोजी पाकिस्तानच्या इस्लामाबादमध्ये इराण आणि अमेरिका यांच्यात चर्चा सुरु होईल
डोनाल्ड ट्रम्प यांनी मानले पाकिस्तानचे आभार; शाहबाज शरीफ काय म्हणाले?
पाकिस्तानचे पंतप्रधान शाहबाज शरीफ यांनी ट्विट करत म्हणाले की, अत्यंत विनम्रतेने, मला हे जाहीर करताना आनंद होत आहे की, ‘इस्लामिक रिपब्लिक ऑफ इराण’ आणि ‘युनायटेड स्टेट्स ऑफ अमेरिका’ तसेच त्यांचे सहयोगी देश यांनी लेबनॉनसह इतर सर्वत्र तातडीने युद्धविराम करण्याबाबत सहमती दर्शविली आहे. आणि हा युद्धविराम त्वरित अंमलात येईल. मी या सुज्ञ निर्णयाचे मनापासून स्वागत करतो आणि दोन्ही राष्ट्रांच्या नेतृत्वाप्रती माझी कृतज्ञता व्यक्त करतो. तसेच, सर्व वाद मिटवून एका निश्चित करारापर्यंत पोहोचण्याच्या उद्देशाने पुढील चर्चा करण्यासाठी, मी त्यांच्या शिष्टमंडळांना शुक्रवार, 10 एप्रिल 2026 रोजी इस्लामाबादला भेट देण्याचे निमंत्रण देतो, असं शाहबाज शरीफ पोस्ट करत म्हणाले.
