राष्ट्रवादीच्या बॅनरवर शरद पवारांचा फोटो
पुणे-उपमुख्यमंत्री अजित पवार यांच्या दुर्दैवी निधनानंतर रिक्त झालेल्या बारामती विधानसभा मतदारसंघाच्या पोटनिवडणुकीसाठी राजकीय घडामोडींनी वेग घेतला आहे. आज उमेदवारी अर्ज भरण्याची शेवटच्या दिवशी महायुतीच्या उमेदवार सुनेत्रा पवार यांनी आपला उमेदवारी अर्ज दाखल केला.
महायुतीकडून ही निवडणूक बिनविरोध करण्याचा प्रयत्न केला जात आहे. पण काँग्रेसने याठिकाणी आकाश विश्वनाथ मोरे यांना उमेदवारी दिली आहे. त्यांनीही आज आपला अर्ज दाखल केला आहे. त्यामुळे ही निवडणूक एकतर्फी होणार की काँग्रेस त्यात रंगत भरणार हे 23 एप्रिलला स्पष्ट होणार आहे.
राष्ट्रवादीच्या मेळाव्यात पोस्टरवर पंतप्रधान नरेंद्र मोदी, केंद्रीय गृहमंत्री अमित शहा यांच्या फोटोनंतर खासदार शरद पवार यांचा फोटो होता. महायुतीच्या नेत्यांसोबत शरद पवार यांचा फोटो लावल्यामुळे दोन्ही राष्ट्रवादी एकत्र येण्याच्या चर्चेचे पुन्हा एकदा पेव फुटले आहे.मेळाव्याच्या ठिकाणी शरद पवारांच्या फोटोची जितकी चर्चा झाली तितकीच चर्चा राष्ट्रवादीच्या नेत्या रूपाली चाकणकर यांच्या अनुपस्थितीचीही झाली. सुनेत्रा पवार यांच्या पोटनिवडणुकीचा अर्ज भरण्याच्या कार्यक्रमात त्या अनुपस्थित होत्या. राष्ट्रवादी काँग्रेसच्या महिला प्रदेशाध्यक्ष म्हणून काम पाहिलेल्या रूपाली चाकणकर यांनी कार्यक्रमाला येणे का टाळले? असा प्रश्न या प्रकरणी उपस्थित होत आहे. भोंदू अशोक खरात प्रकरणात राज्य महिला आयोगाच्या अध्यक्षपदाचा व महिला प्रदेशाध्यक्षपदाचा राजीनामा द्यावा लागल्यामुळे रुपाली चाकणकर पक्षावर नाराज असल्याची चर्चा आहे.
