अभंग-गवळणींच्या सुरांनी जंगली महाराज पुण्यतिथी उत्सवात रंगली भक्तीमय मैफल
पुणे : ‘देवाचिये द्वारी उभा क्षणभरी’….‘घेई छंद मकरंद’,‘सावळा नंदाचा मूळ खोटा गे’ या अभंग, गवळणी आणि भक्तिरसाने ओथंबलेल्या सुरेल सादरीकरणाने ‘सद्गुरु श्री जंगली महाराज १३६ वा पुण्यतिथी उत्सव’ भक्तिमय वातावरणात रंगला. राजीव बर्वे व प्रियंका बर्वे यांच्या गायन सेवेमुळे रसिक मंत्रमुग्ध झाले.
श्री जंगली महाराज देवस्थान ट्रस्ट, पुणेच्या वतीने ‘सद््गुरु श्री जंगली महाराज १३६ वा पुण्यतिथी उत्सव’ साजरा करण्यात येत आहे. या उत्सवात राजीव बर्वे व प्रियांका बर्वे यांनी गायन सेवा दिली.
कार्यक्रमाची सुरुवात प्रियंका बर्वे यांनी हंसध्वनी रागातील गणपती स्तवनाने केली. त्यानंतर राजीव बर्वे यांनी सादर केलेल्या संत ज्ञानेश्वर महाराज यांच्या ‘देवाचिये द्वारी उभा क्षणभरी’ या अभंगाने वातावरण प्रसन्न झाले. पुढे संत तुकाराम महाराजांचे ‘विष्णुमय जग वैष्णवांचा धर्म’, ‘मी माझा हरपून बसले गं’, ‘ध्यान करू जाता मन हरपले’, ‘घेई छंद मकरंद’ या अभंगांनी श्रोत्यांना भक्तिरसाचा आनंद दिला.
संत नामदेवांच्या रचनेवर आधारित व श्रीधर फडके यांनी संगीतबद्ध केलेले ‘विठ्ठला आवडी प्रेम भाव’ या सादरीकरणालाही विशेष दाद मिळाली. प्रियंका बर्वे यांनी सादर केलेली ‘सावळा नंदाचा मूळ खोटा गे’ ही गवळण टाळ्यांच्या गजरात रंगली. श्रोत्यांना तल्लीन करणाऱ्या ‘अवघा रंग एक झाला’ या अभंगाने कार्यक्रमाचा समारोप झाला.
कार्यक्रमासाठी धनंजय वसवे (ढोलकी), आदित्य आठल्ये (तबला), राहुल गोळे (हार्मोनियम), अनय गाडगीळ (सिंथेसायझर) व राजेंद्र साळुंखे (तालवाद्य) यांनी उत्कृष्ट साथ-संगत केली.
