पुणे : कसबा पेठेतील श्रीराम मंदिरात (चव्हाण) आज पारंपरिक पद्धतीने आणि मोठ्या भक्तीभावाने श्रीराम जन्मोत्सव सोहळा साजरा करण्यात आला. महोत्सवाचे यंदाचे ३२वे वर्ष आहे. उपक्रमाविषयी गणेश चव्हाण यांनी प्रास्ताविकात माहिती दिली. जन्मोत्सवानिमित्त मंदिरात फुलांची आकर्षक सजावट करण्यात आली होती. श्रीराम जन्मोत्सवानिमित्त श्रीराम जन्म कीर्तन व सुरेल श्रीराम भक्तीगीतांच्या कार्यक्रमाचे आयोजन करण्यात आले होते. ह. भ. प. अंजली कऱ्हाडकर यांनी कीर्तन सेवा सादर केली तर डॉ. अनघा धायगुडे, प्रणव तडवळकर, विद्या यंदे, तनुजा चव्हाण यांनी भक्तीगीते सादर केली. अशोक मोरे, प्रणव तडवळकर, धनंजय साळुंखे यांनी साथसंगत केली. परिसरातील भाविकांनी मोठ्या संख्येने हजेरी लावत श्रीरामाचा जयघोष केला. चव्हाण परिवार, श्रीराम अभिमन्यू मंडळ ट्रस्ट, चक्रवर्ती अशोक मंडळ ट्रस्ट यांच्या सहकार्याने श्रीराम जन्मोत्सवाचे आयोजन करण्यात आले होते. गणेश चव्हाण, भोला वांजळे यांनी संयोजन केले. श्रीराम जन्मोत्सवानिमित्त नागरिकांसाठी मोफत आरोग्य तपासणी शिबिर घेण्यात आले. या शिबिराचा नागरिकांनी मोठ्या संख्येने लाभ घेतला.
