युवा संगीत साधकांना पंडित प्रल्हादबुवा जोशी स्मृती शिष्यवृत्ती प्रदान
पुणे : शिष्याने आपले आचार-विचार उत्तम ठेवत संगीत विद्येचा अभ्यास करत अखंडितपणे गुरुसेवा करून गुरुकृपा संपादन करावी. संगीत क्षेत्रात प्रसिद्धीच्या मागे न लागता आधी सिद्धी प्राप्त करा, प्रसिद्धी आपोआप मिळेलच. प्रसिद्धीच्या मागे लागण्याची गरज नाही, असा ज्येष्ठत्वाचा सल्ला पद्मश्री पंडित व्यंकटेशकुमार यांनी दिला.
बेडेकर गणपती मंदिर व संगीताचार्य द. वि. काणेबुवा प्रतिष्ठानतर्फे आयोजित रामनवमी महोत्सवात बुधवारी पंडित प्रल्हादबुवा जोशी स्मृती शिष्यवृत्ती प्रदान सोहळ्याचे आयोजन करण्यात आले होते. तनिष्क अरोरा, नुपूर देसाई, देवश्री दंडवते, केदार केळकर या युवा संगीत साधकांना पंडित व्यंकटेशकुमार यांच्या हस्ते शिष्यवृत्ती प्रदान करण्यात आली. प्रशस्तीपत्र आणि दहा हजार रुपये असे शिष्यवृत्तीचे स्वरूप होते. बेडेकर गणपती मंदिर सभागृहात कार्यक्रमाचे आयोजन करण्यात आले होते. जोशी बिल्डकॉनचे एच. पी. जोशी, चितळे बंधूचे संजय चितळे, बेडकर गणपती मंदिराचे गोविंदराव बेडेकर, विदुषी मंजुषा पाटील उपस्थित होते.
पंडित व्यंकटेशकुमार विद्यार्थ्यांना मार्गदर्शन करताना पुढे म्हणाले, संगीत क्षेत्रात विद्यार्थ्याला अनेक राग येणे महत्त्वाचे नसून एखादा राग परिपूर्णते आत्मसात करणे आवश्यक आहे. शिष्यवृत्तीप्राप्त विद्यार्थ्यांनी संगीत क्षेत्रात सखोल ज्ञान प्राप्त करून गुरूंच्या नजरेत स्थान प्राप्त करावे.
एच. पी. जोशी म्हणाले, वडिलांच्या कृपेची उतराई व्हावी म्हणून त्यांच्या स्मृतीप्रित्यर्थ गायन क्षेत्रात उत्तम किरकिर्द घडवू इच्छिणाऱ्या विद्यार्थ्यांना शिष्यवृत्ती प्रदान करण्यात येत आहे. गुरू-शिष्य परंपरेतून शास्त्रीय संगीताचे स्वर या हृदयीचे त्या हृदयी पोहोचून ही परंपरा अखंडित रहावी अशी अपेक्षा आहे.
संजय चितळे यांनी उपक्रमाचे कौतुक करून शास्त्रीय संगीतात कारकीर्द घडवू इच्छिणाऱ्या विद्यार्थ्यांना शिष्यवृत्तीमुळे प्रोत्साहन मिळेल, असे सांगितले.
प्रास्ताविकात विदुषी मंजुषा पाटील यांनी पंडित प्रल्हादबुवा जोशी आणि शिष्यवृत्तीविषयी माहिती दिली.
पुरस्कार वितरण सोहळ्यानंतर पंडित व्यंकटेशकुमार यांची गायन मैफल आयोजित करण्यात आली होती. त्यांना भरत कामत (तबला), सुयोग कुंडलकर (संवादिनी), शिवराज पाटील, नागनाथ नागेश (तानपुरा, सहगायन) यांनी साथसंगत केली.
रामनवमीनिमित्त संज्योत केतकर यांचे गुरुवारी रामजन्म कीर्तन झाले. त्यांना भरत कामत (तबला), सुयोग कुंडलकर (संवादिनी), माऊली टाकळकर (टाळ) यांनी साथसंगत केली.
महोत्सवाअंतर्गत विदुषी देवकी पंडित यांचे गायन झाले. त्यांना प्रशांत पांडव (तबला), अमेय बिच्चू (संवादिनी) यांनी साथ केली. अनुराग अलुरकर यांचे एकल तबलावादन झाले. त्यांना कल्पतरू ठाकरे यांनी लहेरा साथ केली. सायंकाळच्या सत्रात पंडित रघुनंदन पणशीकर यांचे गायन झाले. त्यांना भरत कामत (तबला), सुयोग कुंडलकर (संवादिनी) यांनी साथसंगत केली.
