समस्त हिंदू आघाडीच्या वतीने सन्मान सोहळा; २२ हजार विद्यार्थ्यांपर्यंत बाजीरावांचे चरित्र पोहोचविणाऱ्या कार्याची दखल
पुणे : अजिंक्य योद्धा श्रीमंत बाजीराव पेशवे यांच्या पराक्रमाचे जाज्वल्य चरित्र महाराष्ट्राच्या कानाकोपऱ्यात पोहोचविण्याचे महत्त्वपूर्ण कार्य करणारे इतिहास अभ्यासक व व्याख्याते जगन्नाथ लडकत यांना ‘शिवतेज पुरस्कार’ देऊन सन्मानित करण्यात आले. शिवतेज दिनानिमित्त पुण्यातील लाल महाल येथे आयोजित समारंभात समस्त हिंदू आघाडीच्या वतीने हा गौरव करण्यात आला.
ज्येष्ठ इतिहास संशोधक पांडुरंग बलकवडे यांच्या हस्ते लडकत यांना शाल, श्रीफळ, सन्मानचिन्ह व चांदीचे कडे प्रदान करून पुरस्कार देण्यात आला. यावेळी व्यासपीठावर इतिहासाचे गाढे अभ्यासक डॉ. आदित्य अभ्यंकर तसेच समस्त हिंदू आघाडीचे कार्याध्यक्ष मिलिंद एकबोटे उपस्थित होते. सन्मान सोहळ्यासाठी मोठ्या संख्येने हिंदू बांधव-भगिनी उपस्थित होते.
गेल्या अनेक वर्षांपासून जगन्नाथ लडकत यांनी तब्बल २२ हजार विद्यार्थ्यांसमोर व्याख्यानांद्वारे श्रीमंत बाजीराव पेशवे यांच्या पराक्रमाचा इतिहास जिवंत ठेवण्याचे कार्य केले आहे. त्यांच्या या सातत्यपूर्ण प्रयत्नांची दखल घेत हा सन्मान प्रदान करण्यात आला.
जगन्नाथ लडकत म्हणाले, अतुलनीय पराक्रम हा जातीय सीमांच्या पलीकडे झळकत असतो, हे बाजीरावांनी आपल्या कृतीतून सिद्ध केले आहे. मात्र आजही त्यांच्या कार्याकडे जातीय दृष्टिकोनातून पाहिले जाते, ही खंत आहे. त्यांनी मिळालेला ‘शिवतेज पुरस्कार’ हा श्रीमंत बाजीराव पेशवे यांच्या महान पराक्रमाला अर्पण केला.
