केवळ फोटो आले म्हणून आरोप करणे चुकीचे:अशोक खरातसोबतच्या फोटोबाबत दीपक केसरकरांचे स्पष्टीकरण
महिला लैंगिक अत्याचारातील आरोपी भोंदूबाबा अशोक खरात याच्या अटकेनंतर राजकीय वर्तुळात आरोप-प्रत्यारोपांच्या फैरी झाडल्या जात आहेत. खरातसोबतचे फोटो व्हायरल झाल्याने टीकेचे धनी ठरलेले माजी मंत्री आणि शिवसेना नेते दीपक केसरकर यांनी अखेर या प्रकरणावर मौन सोडले आहे. “अशोक खरातचे कृत्य घृणास्पद असून त्याचा मी निषेधच करतो, मात्र केवळ फोटोंच्या आधारे राजकीय नेत्यांवर आरोप करणे चुकीचे आहे,” असे स्पष्टीकरण केसरकर यांनी एका व्हिडिओच्या माध्यमातून दिले आहे.
अशोक खरातसोबत उपमुख्यमंत्री एकनाथ शिंदे, खासदार श्रीकांत शिंदे आणि दीपक केसरकर यांचे फोटो सध्या सोशल मीडियावर व्हायरल झाले आहेत. यावर स्पष्टीकरण देताना दीपक केसरकर म्हणाले, मी मुंबईच्या बाहेर असल्याने अशोक खरात प्रकरणावर काही खुलासे करु शकलो नाही. त्यामुळे, व्हिडिओच्या माध्यमातून मी माझी भूमिका मांडत आहे.
दीपक केसरकर महणाले, नाशिकमधील ईशान्येश्वर मंदिरासाठी रस्ता बनवण्याच्या संदर्भात अशोक खरात हे एकनाथ शिंदे यांना भेटण्यासाठी आले होते. त्यावेळी माझी त्यांची पहिली ओळख झाली. खरात यांचा खगोलशास्त्रात (Astronomy) चांगला अभ्यास असल्याने माझ्यासारख्या अनेक लोकांची त्यांच्याशी ओळख होती. व्हायरल झालेला दुसरा फोटो त्यांच्या मुलीच्या लग्नातील आहे. मात्र, त्यांच्या वैयक्तिक आयुष्याबद्दल किंवा कृत्यांबद्दल मला कोणतीही माहिती नव्हती.
या प्रकरणावरून ठाकरे गटाचे खासदार संजय राऊत यांनी सरकारवर जोरदार हल्ला चढवला होता. “दीपक केसरकर शिक्षणमंत्री असताना अशोक खरात हा बाबा शिक्षण खात्यात लक्ष घालायचा. बदल्या, बढत्या आणि महत्त्वाची कामे करण्यासाठी हा बाबा केसरकरांना सांगायचा. ‘ट्रायडंट’ हॉटेलमध्ये बसून ही सर्व कामे व्हायची आणि खरातच शिक्षण खाते चालवायचा,” असा खळबळजनक आरोप राऊत यांनी पत्रकार परिषदेत केला होता.
संजय राऊतांच्या आरोपांना प्रत्युत्तर देताना दीपक केसरकर म्हणाले, “संजय राऊत यांचे आरोप पूर्णपणे बिनबुडाचे आहेत. अशोक खरात कधीही माझ्या कार्यालयात किंवा मंत्रालयातील दालनात आलेले नाहीत. त्यामुळे त्यांनी माझे खाते चालवण्याचा प्रश्नच उद्भवत नाही. माझ्या कार्यकाळात शिक्षण आणि मराठी भाषा विभागात जे ऐतिहासिक निर्णय झाले, ते यापूर्वी कधीही झाले नव्हते. केवळ एखाद्या कार्यक्रमातील फोटोंवरून अशा प्रकारचे गंभीर आरोप करणे राजकीय संस्कृतीला धरून नाही.”
अशोक खरात याला पोलिसांनी अटक केली असून या प्रकरणाचा तपास विशेष तपास पथकाद्वारे (SIT) सुरू आहे. या तपासात खरातच्या राजकीय संबंधांबाबत काही ठोस निष्पन्न होते का, याकडे आता सर्वांचे लक्ष लागले आहे. मात्र, केसरकर यांच्या या स्पष्टीकरणामुळे या वादाला नवे वळण मिळाले आहे.
