पुणे -अशोक खरात याच्या अटकेनंतर राज्यभरात खळबळ उडाली असतानाच आता या प्रकरणाने राजकीय वळण घेतले आहे. धार्मिक श्रद्धा, दैवी शक्ती आणि मंत्रतंत्राच्या नावाखाली महिलांचा विश्वास संपादन करून अत्याचार केल्याचा गंभीर आरोप खरातवर आहे. या प्रकरणात अनेक धक्कादायक बाबी समोर येत असताना, त्याच्याशी संबंधित फोटो आणि व्हिडिओमुळे राज्य महिला आयोगाच्या अध्यक्षा रुपाली चाकणकर यांच्यावरही प्रश्नचिन्ह निर्माण झाले आहे.
अशोक खरातच्या पाद्यपूजेचा व्हिडिओ आणि विविध कार्यक्रमांतील छायाचित्रे समोर आल्यानंतर चाकणकर यांच्या राजीनाम्याची मागणी जोर धरू लागली आहे. याच पार्श्वभूमीवर राष्ट्रवादी काँग्रेसच्या नेत्या रुपाली पाटील-ठोंबरे यांनी सोशल मीडियावर केलेल्या एका पोस्टमुळे मोठी खळबळ उडाली आहे. रुपाली चाकणकर फरार… बजाव ताली…, अशी पोस्ट त्यांनी शेअर केली असून, त्यानंतर राजकीय वर्तुळात चर्चांना उधाण आले आहे.
दरम्यान, रुपाली पाटील-ठोंबरे यांनी पत्रकार परिषद घेऊन चाकणकर यांच्या राजीनाम्याची मागणी केली. हा विषय कोणत्याही पक्षाचा किंवा जातीचा नसून महिलांच्या सुरक्षिततेशी संबंधित असल्याचे त्यांनी स्पष्ट केले. अशोक खरातशी संबंधित ट्रस्टमध्ये चाकणकर यांची भूमिका असल्याचा उल्लेख करत त्यांनी प्रश्न उपस्थित केला की, त्यामुळेच पोलिसांनी कारवाई उशिरा केली का? तसेच, जप्त करण्यात आलेल्या 58 व्हिडिओंच्या पार्श्वभूमीवर किती महिलांवर अत्याचार झाले असतील, याबाबतही त्यांनी गंभीर शंका व्यक्त केली.
पाटील-ठोंबरे यांनी पुढे सांगितले की, चाकणकर यांनी तातडीने पदाचा राजीनामा द्यावा, अन्यथा निष्पक्ष तपास होऊ शकणार नाही. त्या पदावर राहिल्यास पुरावे नष्ट होण्याची शक्यता असल्याचा आरोपही त्यांनी केला. याशिवाय, हा मुद्दा उपमुख्यमंत्री सुनेत्रा पवार यांच्या निदर्शनास आणून देणार असल्याचे त्यांनी सांगितले. जर राजीनामा दिला नाही, तर राज्यभर आंदोलन उभारण्याचा इशाराही त्यांनी दिला आहे.
