हम दोनो: कहानी देव और गोल्डी की
तनुजा चतुर्वेदी लिखित, हम दोनो : कहानी देव और गोल्डी की या पुस्तकाचे आज मुंबईत माहिती आणि प्रसारण मंत्रालयाच्या प्रकाशन विभाग संचालनालयाच्या वतीने समारंभपूर्वक प्रकाशन केले गेले. मुंबईतील राष्ट्रीय चित्रपट विकास महामंडळाच्या आवारातील, भारतीय सर्जनशील तंत्रज्ञान संस्थेच्या संकुलात या पुस्तक प्रकाशनाचा समारंभ आयोजित केला गेला होता. या पुस्तकातून देव आनंद आणि विजय आनंद या भारतीय चित्रपटसृष्टीतील दोन दिग्गज बंधूद्वयीमधील कलात्मक भागीदारी आणि त्यांच्या चित्रपटीय वारशाचा गौरव केला आहे. यासोबतच त्यांच्यातील परस्पर सर्जनशील सहकार्य आणि भारतीय चित्रपट उद्योगातील त्यांच्या चिरस्थायी योगदानाची मांडणीही या पुस्तकात केलेली आहे.
प्रसिद्ध पटकथा लेखक आणि अभिनेते अमोल गुप्ते हे या प्रकाशन समारंभाचे प्रमुख पाहुणे म्हणून उपस्थित होते. यावेळी त्यांनी उपस्थितांशी संवाद साधला. गोल्डी आनंद यांच्याशी झालेल्या आपल्या पहिल्या भेटीच्या आठवणींना त्यांनी उजाळा दिला. आनंद बंधूंनी त्या काळातील चित्रपट क्षेत्रामधील इतर दिग्गज व्यक्तिमत्त्वांसोबत मिळून अजरामर चित्रपटांची निर्मिती केल्याचे अमोल गुप्ते यांनी नमूद केले.
प्रकाशन विभागाचे प्रधान महासंचालक भूपेंद्र कैथोला यांनीही उपस्थितांना संबोधित केले. या पुस्तकाचे प्रकाशन म्हणजे केंद्र सरकारने देव आनंद आणि विजय आनंद या चित्रपट क्षेत्रातील दिग्गज व्यक्तिमत्त्वांना अनोखी पद्धतीने वाहिलेली श्रद्धांजली असल्याचे ते म्हणाले. प्रकाशन विभाग भारतीय संस्कृतीवरील महत्त्वाच्या पुस्तकांच्या प्रकाशिन करत आला आहे, आणि चित्रपटसृष्टी हा देशाच्या संस्कृतीचा एक महत्त्वाचा भाग असल्याने विभागाने हे पुस्तक प्रकाशित करण्याचा निर्णय घेतल्याची माहिती त्यांनी दिली.
भारतीय सर्जनशील तंत्रज्ञान संस्थेचे मुख्य कार्यकारी अधिकारी विश्वास देवसकर यांनीही उपस्थितांसमोर आपले विचार मांडले एव्हीजीसी-एक्सआर क्षेत्रातील उदयोन्मुख प्रतिभेसाठी औपचारिक प्रशिक्षणाचे महत्त्व त्यांनी अधोरेखित केले. भारतीय सर्जनशील तंत्रज्ञान संस्था अशाच प्रकारचे प्रशिक्षण देत असल्याचेही त्यांनी नमूद केले.
लेखिका तनुजा चतुर्वेदी यांनी आपल्या पुस्तकाबद्दल मनोगत व्यक्त गेले. पुस्तकाच्या औपचारिक प्रकाशनाचा हा क्षण भारावून टाकणारा असल्याची भावना त्यांनी व्यक्त केली. आपण नवकेतन प्रॉडक्शनशी जोडलेलो होतो याबद्दल त्यांनी सांगितले. आपल्यावर देव साहेब आणि गोल्डी साहेब यांचा आशीर्वाद असल्याचे आत्ताही जाणवते अशी भावना त्यांनी व्यक्त केली. भारतीय चित्रपटसृष्टीतील या दिग्गज बंधूच्या जोडीसोबतच्या अनेक संस्मरणीय क्षणांना त्यांनी उजाळा दिला.
या कार्यक्रमाच्या निमित्ताने भारतीय सर्जनशील तंत्रज्ञान संस्थेचे मुख्य कार्यकारी अधिकारी आणि प्रकाशन विभागाचे प्रधान महासंचालक यांच्यात सामंजस्य कराराची देवाणघेवाणही झाली. या कराराअंतर्गत, प्रकाशन विभागाच्या वतीने एव्हीजीसी-एक्सआर क्षेत्रावरील भारतीय सर्जनशील तंत्रज्ञान संस्थेची सर्व पुस्तके प्रकाशित केली जाणार आहेत. ऑरेंज इकोनॉमी अर्थात सर्जनशील क्षेत्रविषयक अर्थव्यवस्थेतील वेगाने उदयाला येत असलेल्या क्षेत्रांची विश्वासार्ह माहिती देशभरातील शाळांपर्यंत पोहोचवता यावी हा या सामंजस्य करारामागचा उद्देश आहे.
या कार्यक्रमाला इतर मान्यवरांसह राष्ट्रीय चित्रपट विकास महामंडळाचे व्यवस्थापकीय संचालक प्रकाश मगदूम आणि प्रकाशन विभागाचे मुख्य संपादक कुलश्रेष्ठ कमल हे देखील उपस्थित होते.
हम दोनो : कहानी देव और गोल्डी की
या पुस्तकात लेखिका तनुजा चतुर्वेदी यांनी दुर्मिळ संदर्भ, असंख्य आठवणी आणि ऐतिहासिक तपशिलांचा मांडला असून, त्याद्वारे त्यांनी आयकॉनिक स्टार देव आनंद आणि ख्यातनाम चित्रपटकार विजय आनंद यांचे व्यक्तिमत्त्व आणि सर्जनशील क्षेत्रातील वाटचाल अत्यंत संवेदनशीलतेने आणि तपशीलवार शब्दबद्ध केली आहे. या जोडीने एक विशिष्ट चित्रपट शैली आणि कथात्मक मांडणीची पद्धत रूढ केल्यानंतर हिंदी चित्रपटसृष्टीतील महत्त्वाच्या सर्जनशील टप्प्याचा मागोवा या पुस्तकातील प्रकरणांमधून घेतला गेला आहे.
हम दोनो : कहानी देव और गोल्डी की हे पुस्तक भारतीय चित्रपटसृष्टीच्या सुवर्णकाळाचे एक महत्त्वाचे दस्तऐवजीकरण ठरले आहे. हे पुस्तक अधिकाधिक लोकांपर्यंत पोहचावे तसेच या पुस्तकातील संशोधनपर आशय – मजकूर व्यापक हिंदी वाचकवर्गासाठी उपलब्ध व्हावा या उद्देशाने, प्रकाशन विभागाने हे पुस्तक हिंदी भाषेत प्रकाशित केले आहे.
भारतीय चित्रपटसृष्टीच्या इतिहासासंबंधीचे हे महत्त्वाचे काम व्यापक प्रमाणात वाचकवर्गापर्यंत पोहचावे आणि वाचकांना या दोन दिग्गज चित्रपटकारांच्या योगदानाबद्दल अधिक चांगल्या रितीने समजून घेता यावे, या उद्देशाने ही हिंदी आवृत्ती प्रकाशित केली गेली आहे.
