पालिकेचा गलथान कारभार
पुणे:
धायरी येथील सर्वात दाट लोकवस्तीच्या बेनकरवस्ती मुख्य रस्त्याच्या कामासाठी एक महिन्यापुर्वी एका बाजूचा दहा फूट रुंदीचा व अर्धा किलोमीटर लांबीचा रस्ता खोदून ठेवण्यात आला आहे. दररोज अपघात वाहतूक कोंडीची समस्या गंभीर बनली आहे.त्यामुळेनागरिकांचे अतोनात हाल सुरू आहे.या गंभीर समस्येकडे आम आदमी पक्षाचे शहर अध्यक्ष धनंजय बेनकर यांनी पालिका प्रशासनाचे लक्ष वेधले आहे.
आम आदमी पक्षाचे शहर अध्यक्ष धनंजय बेनकर म्हणाले,
महापालिका प्रशासनाच्या गलथान कारभारामुळे रस्त्याचे काम अत्यंत मंदगतीने सुरू आहे. एक महिना होऊनही रस्ता खोदलेल्या अवस्थेत आहेत.
खोदलेल्या खड्ड्यात स्कूल बस, रिक्षा, वाहने कोसळुन अपघात होत आहेत.रस्त्याचे काम कधी सुरू झाले, ते कधी पुर्ण होणार आहे, या कामाचा ठेकेदार कोण आहे, किती रक्कम मंजूर आहे आदीची माहिती देणारा फलकही पालिकेने कामाच्या ठिकाणी लावला नाही.
त्यामुळे या कामात काहीतरी गौडबंगाल आहे असा आरोप धनंजय बेनकर यांनी केला आहे.
बेनकरवस्ती येथील मारीगोल्ड बेकरी ते काळुबाई मंदिर रस्ता चौक पर्यंत मुख्य रस्ता खोदला आहे. खोदलेल्या खड्ड्यात दगड मुरुमही टाकला नाही. ठेकेदार व अधिकाऱ्यांच्या संगनमताने रस्त्याच्या कामात मनमानी सुरू आहे.
प्रचंड वाहतूक कोंडी सुरू असतानाही वाहतूक विभाग ठप्प पडला आहे. ठेकेदार खाजगी वार्ड नेमून वाहतूक नियमन करत नाही त्यामुळे नागरिकांना घराबाहेर पडणे धोक्याचे झाले आहे तर वाहतूक कोंडीत अडकुन पडलेल्या दहावीच्या विद्यार्थ्यांना परिक्षेला वेळेवर पोहचता येत नाही.
