पुणे-केंद्रीय रस्ते वाहतूक व महामार्ग मंत्री नितीन गडकरी यांनी पुणे विभागासाठी सुमारे ५० हजार कोटी रुपयांच्या विविध रस्ते प्रकल्पांना मंजुरी दिल्याची माहिती दिली. पुण्यात झालेल्या एका बैठकीत या महत्त्वाच्या प्रकल्पांचे सादरीकरण करण्यात आले.या बैठकीत पाच प्रमुख रस्ते प्रकल्पांचे सादरीकरण करण्यात आले. यामध्ये पुणे-शिरूर कॉरिडॉरचा ५४ किलोमीटर लांबीचा प्रकल्प समाविष्ट आहे, ज्यासाठी ७ हजार ५१५ कोटी रुपयांचा खर्च अपेक्षित आहे. तसेच, तळेगाव-चाकण-शिक्रापूर हा ५३ किलोमीटरचा मार्ग असून, त्यासाठी सुमारे ४ हजार कोटी रुपये खर्च होणार आहेत. या प्रकल्पाची निविदा निश्चित करण्यात आली आहे.
याव्यतिरिक्त, पुणे-सोलापूर मार्गावरील हडपसर ते यवत हा ३१ किलोमीटरचा प्रकल्प प्रस्तावित असून, त्यासाठी सुमारे ५ हजार कोटी रुपये खर्च अपेक्षित आहे. नाशिक फाटा ते खेड या मार्गासाठी सुमारे ७ हजार ८०८ कोटी रुपयांचा खर्च होणार आहे. हे सर्व प्रकल्प पूर्ण झाल्यानंतर पुणे ते छत्रपती संभाजीनगर हे अंतर सुमारे सव्वा दोन तासांत पार करता येणार असल्याचे गडकरी यांनी सांगितले.
पुणे शहरातील वाढती वाहतूक समस्या आणि प्रदूषण लक्षात घेऊन, शहराला वाहतूकमुक्त आणि प्रदूषणमुक्त करण्याच्या दृष्टीने ही बैठक आयोजित करण्यात आली होती. या सहा प्रकल्पांसाठी राज्य सरकारकडून आवश्यक असलेल्या काही बाबींमध्ये सहकार्य करण्याची विनंती करण्यात आली आहे. विशेषतः, वाळू, दगड यांसारख्या बांधकाम साहित्यावरील काही शुल्क माफ करण्याची मागणी राज्य सरकारकडे करण्यात आल्याचे गडकरी यांनी स्पष्ट केले.
दरम्यान, कोल्हापूर परिसरातील काही महत्त्वाच्या रस्त्यांबाबतही बैठकीत चर्चा झाली. तसेच, मुंबई ते बंगळूर दरम्यान नवीन महामार्ग उभारण्याची योजना असून, तो जवाहरलाल नेहरू पोर्ट जवळून जात पुण्यामधून पुढे जाणार असल्याची माहिती त्यांनी दिली.
पालखी मार्गाचे काम जवळपास पूर्ण झाले असून, पुढील महिन्यात या मार्गाची पाहणी करण्यात येणार आहे. ‘मी स्वतः देहू-पंढरपूर आणि आळंदी-पंढरपूर हा पालखी मार्ग पाहणार आहे. त्यानंतर पंतप्रधान नरेंद्र मोदी यांच्या हस्ते या मार्गाचे उद्घाटन करण्यात येईल,’ असे गडकरी यांनी सांगितले.
याशिवाय, कात्रज उड्डाणपूलाचे काम अंतिम टप्प्यात असून, पुणे रिंगरोड प्रकल्प राज्य सरकारमार्फत राबवला जात आहे. पुणे-सातारा रस्त्यासाठी सुमारे ६ हजार कोटी रुपयांचा डीपीआर तयार करण्यात येणार असून, पुणे-मुंबई जुन्या महामार्गाच्या सुधारणा कामालाही गती देण्यात येणार आहे. पुढील महिन्यात अनेक प्रकल्पांचे उद्घाटन होणार असल्याचेही गडकरी यांनी सांगितले.
