मुंबई-महाराष्ट्र शासनाचा आरोग्य विभाग आणि महाराष्ट्र वैद्यकीय वस्तू खरेदी प्राधिकरण सध्या भ्रष्टाचाराच्या मोठ्या वादात सापडले आहे. मनसे नेते संदीप देशपांडे यांनी आरोग्य विभागाच्या निविदा प्रक्रियेत कोट्यवधी रुपयांचा गैरव्यवहार झाल्याचा खळबळजनक आरोप केला आहे. “ज्या एक्स-रे मशीनची किंमत १० लाख रुपये आहे, ती ६१ लाखांना खरेदी करून सरकारी तिजोरीची लूट केली जात आहे,” असा दावा करत देशपांडे यांनी तत्कालीन आरोग्यमंत्री तानाजी सावंत यांच्या कार्यकाळातील व्यवहारांच्या चौकशीची मागणी केली आहे.
संदीप देशपांडे यांनी दिलेल्या माहितीनुसार, आरोग्य विभागाने ‘जी ई एम २०२४’ (GeM 2024) अंतर्गत डिजिटल पोर्टेबल एक्स-रे मशीन खरेदीसाठी निविदा काढली होती. बाजारभावानुसार किंवा शासकीय पोर्टलवर या मशीनची किंमत साधारणतः १० लाख रुपये आहे. मात्र, महाराष्ट्र शासनाने याच मशीनसाठी प्रति नग ६१ लाख २० हजार रुपये मोजले आहेत. अशा एकूण ८० मशिनची खरेदी करण्यात आली असून, शासनाने ६ पट अधिक दर देऊन जनतेच्या पैशांचा अपव्यय केल्याचा आरोप मनसेने केला आहे.
या निविदा प्रक्रियेत ‘श्रद्धा डिस्ट्रीब्यूटर’ आणि ‘लक्ष्मी सर्जिकल’ या दोन कंपन्या पात्र ठरल्या होत्या, ज्यापैकी श्रद्धा डिस्ट्रीब्यूटरला हे कंत्राट मिळाले. “मूळ उत्पादक कंपन्यांना तांत्रिक कारणास्तव अपात्र ठरवून केवळ विशिष्ट वितरकांना झुकते माप का दिले जात आहे? या कंपन्यांचे आणि राजकीय नेत्यांचे काय लागेबांधे आहेत?” असा सवाल संदीप देशपांडे यांनी उपस्थित केला आहे.
चिनी उत्पादनांचा संशयास्पद वापर
एक्स-रे मशीनसोबतच ‘मिडी एक्स डिव्हाइस प्रायव्हेट लिमिटेड’ (Midi X Device Pvt Ltd) या कंपनीला देण्यात आलेल्या कंत्राटावरही त्यांनी बोट ठेवले आहे. केंद्र सरकारच्या नियमांनुसार, सीमावर्ती देशांतील (चीन इ.) उत्पादनांसाठी विशेष नोंदणी अनिवार्य आहे. स्वदेशी कंपन्यांना डावलून चिनी बनावटीच्या वस्तूंचा वापर करणाऱ्या कंपन्यांना प्राधान्य देऊन शासनाच्या धोरणांचाच उल्लंघन केले जात असल्याचे संदीप देशपांडे यांनी नमूद केले.
संदीप देशपांडे यांनी या प्रकरणाची आर्थिक गुन्हे शाखेकडून (EOW) चौकशी करण्याची मागणी केली आहे. “आरोग्यासाठी बजेट नाही असे सांगणारे सरकार ६ पट जादा किमतीने खरेदी कशी काय करते?” असा संतप्त सवाल त्यांनी केला. तसेच, त्यांच्याकडे अशा १४ यंत्रसामग्री खरेदीचे पुरावे असून, येत्या काही दिवसांत दररोज एका नवीन घोटाळ्याचा पर्दाफाश करणार असल्याचा इशाराही त्यांनी दिला आहे.
या गंभीर आरोपामुळे राज्याच्या राजकीय वर्तुळात मोठी खळबळ उडाली असून, आता शासन आणि तत्कालीन आरोग्यमंत्री यावर काय भूमिका घेतात, याकडे सर्वांचे लक्ष लागले आहे.
