आंध्र प्रदेशातील काकीनाडा जिल्ह्यातील वेटलापलेम गावात शनिवारी एका फटाक्याच्या कारखान्यात स्फोट झाला. यात अठरा जणांचा मृत्यू झाला आणि सहा जण गंभीर जखमी झाले. स्फोट झाला तेव्हा युनिटमध्ये २० हून अधिक कर्मचारी काम करत होते.स्थानिकांनी सांगितले की, दुपारी २ वाजण्याच्या सुमारास हा स्फोट झाला. स्फोट इतका जोरदार होता की त्याचा आवाज ५ किलोमीटरपर्यंत ऐकू येत होता. त्यानंतर गावकरी घटनास्थळी धावले आणि जखमींना रुग्णालयात नेण्यास सुरुवात केली.
मुख्यमंत्री एन. चंद्रबाबू नायडू यांनी या घटनेबद्दल तीव्र दुःख व्यक्त केले आहे. त्यांनी संबंधित मंत्री आणि वरिष्ठ अधिकाऱ्यांना घटनास्थळी पोहोचून परिस्थितीवर लक्ष ठेवण्यास सांगितले आहे. प्रशासन मदत आणि बचाव कार्यात गुंतले आहे.
राज्याच्या गृहमंत्री वंगालपुडी अनिता यांनी अशी भीती व्यक्त केली की, मृत्यूमुखी पडलेल्यांची संख्या वाढू शकते, कारण काही जखमींची प्रकृती गंभीर असल्याचे सांगितले जात आहे. सर्व जखमींना जवळच्या रुग्णालयात दाखल करण्यात आले आहे.
