पुणे : सुप्रसिद्ध कथक नर्तक डॉ.नंदकिशोर कपोते आणि त्यांच्या शिष्या यांचा कथक नृत्याचा कार्यक्रम बँकाॅक येथे सादर झाला. रंगतदार झालेल्या या कार्यक्रमाला परदेशी प्रेक्षकांचा प्रचंड संख्येने प्रतिसाद मिळाला.
बँकाॅक मधील एंबेसी ऑफ इंडिया येथील स्वामी विवेकानंद सांस्कृतिक केंद्र येथे दिनांक २९ जानेवारी रोजी झालेल्या या कार्यक्रमात डॉ.नंदकिशोर कपोते यांच्या समवेत निकिता मोघे, भावना सामंत, पद्मिनी सोनावणे, समृद्धी कुलकर्णी, प्रेरणा भिंगारे, अनुष्का सामंत, अपूर्वा नीला, हर्षदा केदार या कलाकारांनाही कथक नृत्यातील विविध प्रकार सादर केले. गणेश वंदना, पं.बिरजूमहाराजांचे भजन, तोडे, परण, ठुमरी, तराना, राम भजन, होरी आदी कथक नृत्य प्रकारांचे सादरीकरण केले. कार्यक्रमास एंबेसी ऑफ इंडियाचे संचालक डाॅ. चैतन्य प्रकाश योगी, सेक्रेटरी संतोष सिंग, सांस्कृतिक संचालक संतोष कुमार, विश्व हिंदू परिषद, थायलंड च्या अध्यक्षा वैशाली उरूमकर हे मान्यवर उपस्थित होते.
या कार्यक्रमासाठी भारतीय सांस्कृतिक संबंध परिषद (आई.सी.सी.आर ) बँकाॅक यांचे महत्त्वाचे सहकार्य होते.
