पुणे:पुण्याच्या महापौरपदी मंजूषा नागपुरे यांची निवड भाजपाने केल्याने त्यांचा उमेदवारी अर्ज आज नगरसचिव योगिता भोसले यांच्याकडे दाखल करण्यात येत आहे. ही निवड बिनविरोध करायची किंवा कसे यांबाबत विरोधी पक्ष नेता कार्यालयात आमदार चेतन पाटील तुपे, विरोधी पक्षनेते निलेश निकम आणि सुनील टिंगरे तसेच सुभाष जगताप यांची चर्चा सुरू होती. निकम आणि तुपे पाटील यांनी यावेळी पक्षाच्या वरिष्ठ नेत्यांशी फोनवरून बोलणी केली. दरम्यान 119 एवढी भाजप संख्या असल्याने भाजपच्याच महापौर होतील हे निश्चित आहे.काँग्रेसकडून महापौर पदासाठी अश्विनी लांडगे,आणि उपमहापौर पदासाठी साहिल केदारी यांनी उमेदवारी अर्ज दाखल केले आहे. त्यामुळे 9 तारखेला निवडणूक होणारच आहे.
योगेश टिळेकर यांना आमदारकी दिल्याने त्यांच्या मातोश्री रंजना टिळेकर यांचा पत्ता कट करण्यात आला. तर मानसी देशपांडे या आमदार, राज्यमंत्री माधुरी मिसाळ यांच्या भावजयी आहेत. त्यामुळे त्यांना पद देण्यात आले नसल्याची माहिती आहे. वर्षा तापकीर यांना सव्वा वर्षानंतर महापौर पद देण्याचे आश्वासन देण्यात आल्याची माहिती आहे.
सिंहगड रोडला प्रथमच महापौर पदाचा मान मिळाला आहे. नागपुरे सलग तिसऱ्यांदा नगरसेवक झाल्या, यंदाच्या निवडणुकीतही त्या बिनविरोध निवडून आल्या आहेत.
पुणे महापालिकेची निवडणूक मैत्रीपूर्ण लढली गेली. देवेंद्र फडणवीस-अजित पवार यांच्यात झालेल्या चर्चेनुसार महापौर-उपमहापौर पदाची निवडणूक बिनविरोध होईल ठरले होते. त्यामुळे या निवडणुकीत उमेदवार दिला जाणार नाही, अशी माहिती राष्ट्रवादीच्या नेत्यांनी दिली.
मंजूषा नागपुरे या कडव्या हिंदुत्ववादी विचारसरणी, भाजपच्या निष्ठावंत नगरसेविका म्हणून ओळखल्या जातात. महापालिकेच्या कामाच त्यांचा चांगला अनुभव आहे. स्थायी समितीसारख्या महत्त्वाच्या समितीवर त्यांनी काम केले आहे. महापौरपदासाठी रंजना टिळेकर, वर्षा तापकीर आणि मानसी देशपांडे यांच्या नावांची चर्चा होती
पक्षीय बलाबल
भाजप :119
राष्ट्रवादी काँग्रेस (अजित पवार गट) : 27
काँग्रेस : 15
राष्ट्रवादी काँग्रेस (शरद पवार गट) : 3
शिवसेना (UBT) : 01
