बी. टी. कवडे रोडवर तरुणीसह टोळक्याचा थरार
पुणे-पुण्यातल्या ‘कोयता गँग’मध्ये केवळ तरुण मुलांचा समावेश पाहायला मिळत होता. मात्र, एका महिलेने हातात शस्त्र घेऊन तोडफोड केल्याचे समोर आल्याने आता शहरातील गुंडगिरी किती खोलवर रुजू पाहते आहे हे दिसून येते आहे. शहरात बेरोजगारी, महागाई ने हैराण आणि संतप्त तरुणाईमधील काही गुन्हेगारीकडे वळत आहेत यातील विविध टोळक्यांच्या थैमानाने आणि त्यांना मिळणाऱ्या राजकीय आश्रयाने गुंडागर्दी वाढली असून, हडपसरमधील बी. टी. कवडे रोडवर शनिवारी रात्री एका शस्त्रधारी टोळक्याने अक्षरशः धुमाकूळ घातला. या घटनेमुळे स्थानिक रहिवाशांची झोप उडाली असून, परिसरात भीतीचे सावट पसरले आहे.
रात्रीच्या शांत वेळेत अचानक आरडाओरडा करत आलेल्या चार तरुण आणि एका तरुणीने हातात धारदार हत्यारे घेऊन रस्त्यावर नंगानाच सुरू केला. तोंडाला कापड बांधून आलेल्या या हल्लेखोरांनी दिसेल त्याला धमकावत आणि शस्त्रांचा धाक दाखवत दहशत निर्माण करण्याचा प्रयत्न केला. या अनपेक्षित प्रकारामुळे रस्त्यावरून जाणाऱ्या पादचाऱ्यांची आणि वाहनचालकांची भंबेरी उडाली, ज्यांना जिकडे वाट मिळेल तिकडे त्यांनी पळ काढला.केवळ धमकावून हे टोळके थांबले नाही, तर त्यांनी आपला मोर्चा व्यावसायिक प्रतिष्ठानांकडे वळवला. रस्त्यालगत असलेल्या अर्ध्या डझन दुकानांवर त्यांनी कोयत्याने सपासप वार करत शटर आणि काचा फोडल्या. तसेच रस्त्याच्या कडेला पार्क केलेल्या अनेक दुचाकी आणि चारचाकी गाड्यांचेही मोठे नुकसान केले. या तोडफोडीमुळे व्यापाऱ्यांचे आणि वाहनमालकांचे मोठे आर्थिक नुकसान झाले आहे.
