जिल्हा परिषद व पंचायत समिती सार्वत्रिक निवडणूक २०२६ : हवेली तालुक्यात EVM FLC प्रक्रिया यशस्वीरीत्या पूर्ण

हवेली : जिल्हा परिषद व पंचायत समिती सार्वत्रिक निवडणूक २०२६ च्या अनुषंगाने हवेली तालुक्यात वापरण्यात येणाऱ्या EVM मशीनच्या FLC (First Level Checking) प्रक्रियेचे काम यशस्वीरीत्या पूर्ण झाले आहे. ही प्रक्रिया निवडणूक निर्णय अधिकारी डॉ. यशवंत माने यांच्या मार्गदर्शनाखाली पार पडली.
EVM तपासणीची संपूर्ण जबाबदारी तहसीलदार तृप्ती कोलते व तहसीलदार अर्चना निकम यांच्या नियंत्रणाखाली राबविण्यात आली. EVM कक्ष अधिकारी सचिन आखाडे, किशोर पाटील व गजानन किरवले यांनी या प्रक्रियेचे काटेकोर नियोजन व प्रभावी अंमलबजावणी केली.
प्राप्त माहितीनुसार, नुकतीच जिल्हा परिषद व पंचायत समिती निवडणुकीसाठी प्राप्त झालेल्या सर्व EVM मशीनची FLC प्रक्रिया पूर्ण करण्यात आली आहे. तपासणीदरम्यान कंट्रोल युनिट (CU) पैकी एकूण ४२५ युनिट्सची तपासणी करण्यात आली बॅलेट युनिट (BU) बाबत पाहता, एकूण १०१३ युनिट्सची तपासणी करण्यात आली.
निवडणूक प्रक्रिया पारदर्शक, सुरक्षित व विश्वासार्ह राहावी यासाठी FLC ही अत्यंत महत्त्वाची प्रक्रिया असून, तांत्रिक तज्ज्ञांच्या उपस्थितीत प्रत्येक मशीनची सखोल तपासणी करण्यात आली. FLC मध्ये अपात्र ठरलेल्या मशीन पुढील वापरासाठी वगळण्यात येणार असल्याची माहिती प्रशासनाकडून देण्यात आली.
निवडणूक निर्णय अधिकारी डॉ. यशवंत माने, तहसीलदार तृप्ती कोलते, तहसीलदार अर्चना निकम तसेच EVM कक्ष अधिकारी यांच्या समन्वयामुळे ही प्रक्रिया वेळेत व शांततेत पूर्ण झाल्याचे नमूद करण्यात आले. आगामी निवडणुका निर्भय व विश्वासाच्या वातावरणात पार पडाव्यात यासाठी प्रशासन पूर्णपणे सज्ज असल्याचेही यावेळी स्पष्ट करण्यात आले.