हवेली जिल्हा परिषद–पंचायत समिती निवडणुकीत उमेदवारांची झुंबड; माघारी नगण्य, थेट लढती अटळ

पुणे : जिल्हा परिषद व पंचायत समिती सार्वत्रिक निवडणूक २०२६ साठी सुरू असलेल्या नामनिर्देशन प्रक्रियेत उमेदवारांची मोठ्या प्रमाणावर गर्दी झाल्याने स्थानिक राजकारण चांगलेच तापले आहे. नामनिर्देशन छाननीनंतर जिल्हा परिषद निवडणुकीसाठी एकूण ६२ नामनिर्देशने वैध ठरली असून त्यामध्ये 12 पुरुष व 32 महिला अशा 44 उमेदवारांचा समावेश आहे. माघारीचे प्रमाण अत्यल्प राहिल्याने अनेक प्रभागांमध्ये थेट व चुरशीच्या लढती अटळ ठरल्या आहेत.
पुणे, कोरेगाव मूल, उरुळी कांचन, थेऊर, लोणी काळभोर व खेड-शिवापूर या विभागांतून मोठ्या संख्येने नामनिर्देशने दाखल झाली. नामनिर्देशन माघारीनंतर जिल्हा परिषद निवडणुकीत एकूण 25 उमेदवार निवडणूक रिंगणात कायम राहिले असून त्यामध्ये १७ महिला उमेदवार आहेत. आकडेवारीवरून महिला उमेदवारांचे वर्चस्व स्पष्टपणे दिसून येत आहे.
दरम्यान, पंचायत समिती निवडणुकीसाठी नामनिर्देशन प्रक्रियेला आणखी मोठा प्रतिसाद मिळाला आहे. पंचायत समितीसाठी एकूण ११२ वैध नामनिर्देशने दाखल झाली असून त्यात 43पुरुष व 38 महिला अशा 81उमेदवारांचा समावेश आहे. माघारीनंतर 42 उमेदवार निवडणूक रिंगणात कायम असून त्यामध्ये केवळ २२ महिला उमेदवार आहेत. अशी माहिती सागर तडके व अंकुश गुरव या महसूल कर्मचाऱ्यांनी दिली.महिला सक्षमीकरणाच्या घोषणांच्या पार्श्वभूमीवर ही आकडेवारी राजकीय वास्तव अधोरेखित करणारी ठरते.
लोणी काळभोर, पेरणे, केसनंद, कोरेगाव मूल, उरुळी कांचन, सोरतापवाडी, थेऊर, आळंदीवाडी, कालवाडी, खेड-शिवापूर व खाणापूर या विभागांमध्ये निवडणुकीची चुरस शिगेला पोहोचली आहे. बिनविरोध निवडीची शक्यता जवळपास संपुष्टात आली आहे.
निवडणूक अधिकारी डॉ. यशवंत माने यांच्या मार्गदर्शनाखाली तसेच तहसीलदार तृप्ती कोलते, अर्चना निकम आणि सचिन आखाडे यांच्या उपस्थितीत संपूर्ण नामनिर्देशन प्रक्रिया पारदर्शकपणे पार पडली. वाढती स्पर्धा लक्षात घेता आचारसंहितेच्या काटेकोर अंमलबजावणीसाठी प्रशासनाने कडक भूमिका घेण्याचे संकेत दिले असून निवडणूक प्रक्रिया शांततेत पार पाडण्यासाठी विशेष खबरदारी घेण्यात येत असल्याचे अधिकाऱ्यांनी स्पष्ट केले आहे.