पुणे: किर्लोस्कर न्यूमॅटिक कंपनी लिमिटेड (KPCL) ने भागधारकांच्या मंजुरीच्या अधीन राहून 23 जानेवारी 2026 रोजी झालेल्या बैठकीत संचालक मंडळाने अमन किर्लोस्कर यांची 1 एप्रिल 2026 ते 31 मार्च 2031 (दोन्ही दिवस समाविष्ट) या पाच वर्षांच्या कालावधीसाठी व्यवस्थापकीय संचालक म्हणून नेमणुकीला मंजुरी दिल्याचे जाहीर केले आहे. KPCL चे सध्याचे व्यवस्थापकीय संचालक के. श्रीनिवासन हे 31 मार्च 2026 रोजी निवृत्त होईपर्यंत कंपनीचे नेतृत्व करत राहतील.
या नियुक्तीबाबत प्रतिक्रिया देताना के. श्रीनिवासन म्हणाले: “समूहामध्ये जवळून काम करत आणि आमच्या सध्याच्या कार्यपद्धतींमध्ये योगदान देत असलेल्या अमन यांना आपल्या व्यवसायाची आणि संस्कृतीची सखोल समज आहे. विविध कार्यक्षेत्रांतील त्यांचा अनुभव सातत्य राखण्यासोबतच भविष्यासाठी नवे दृष्टिकोनही घेऊन येईल. त्यांचा दृष्टीकोन आणि तंत्रज्ञानावर अधिक केंद्रित केलेले लक्ष यामुळे KPCL आपला प्रभाव वाढवत राहील, नव्या संधी स्वीकारेल आणि अभियांत्रिकी क्षेत्रातील विश्वासार्ह भागीदार म्हणून आपले स्थान कायम राखेल याबद्दल मला पूर्ण विश्वास आहे. ही जबाबदारी स्वीकारताना त्यांना मी मनःपूर्वक शुभेच्छा देतो.”
अमन किर्लोस्कर यांनी मे 2018 मध्ये किर्लोस्कर चिलर्स प्रायव्हेट लिमिटेड येथे सप्लाय चेन मॅनेजर म्हणून किर्लोस्कर समूहामध्ये आपल्या कारकिर्दीची सुरुवात केली. त्यानंतर ऑगस्ट 2019 मध्ये ते किर्लोस्कर न्यूमॅटिक कंपनी लिमिटेडमध्ये वरिष्ठ व्यवस्थापक म्हणून रुजू झाले. 2020 मध्ये त्यांची महाव्यवस्थापक (ऑपरेशन्स) म्हणून पदोन्नती झाली आणि त्यानंतर ते एअर कंप्रेसर आणि ट्रान्समिशन विभागांच्या उत्पादन, पुरवठा साखळी, फाउंड्री, प्रकल्प अभियांत्रिकी आणि गुणवत्तापूर्ण काम या कार्यांचे सक्रियपणे व्यवस्थापन करत आहेत. कोव्हिड 19 च्या दुसऱ्या लाटेदरम्यान देशाला ऑक्सिजन आणि त्याच्या उत्पादनासाठी आवश्यक असलेल्या यंत्रसामग्रीची अत्यंत गरज असताना, स्क्रू कंप्रेसरच्या उत्पादनाचा विस्तार करण्यातही त्यांनी महत्त्वाची भूमिका बजावली. त्यानंतर 2023 मध्ये त्यांनी एअर कंडिशनिंग आणि रेफ्रिजरेशन व्यवसाय युनिटचे प्रमुख म्हणून जबाबदारी स्वीकारली. या भूमिकेत त्यांनी नवी उत्पादने सुरू करणे आणि त्यांची विक्री करण्यात मदत केली तसेच विभागाच्या एकूण विक्री आणि नफ्यात लक्षणीय वाढ केली.
अमन यांनी 2017 मध्ये ब्रायंट युनिव्हर्सिटी येथून ग्लोबल सप्लाय चेन मॅनेजमेंट हा प्रमुख विषय आणि राज्यशास्त्र या उप विषयासह पदवी संपादन केली. त्यांनी शैक्षणिक आणि व्यावसायिक दोन्ही क्षेत्रांत उत्कृष्ट कामगिरी केली असून त्यांना प्रतिष्ठेच्या युनिव्हर्सिटी-वाइड जेरेमियाह क्लार्क बार्बर कमेन्समेंट पुरस्काराने सन्मानित करण्यात आले.
