मुंबई- बदलापूर पश्चिम परिसरात स्कूल व्हॅनमध्ये चार वर्षांच्या चिमुकलीवर झालेल्या अमानुष अत्याचाराच्या घटनेने संपूर्ण महाराष्ट्र हादरून गेला आहे. या धक्कादायक घटनेनंतर प्रशासन अखेर खडबडून जागं झालं असून, कल्याण प्रादेशिक परिवहन कार्यालयाने संबंधित स्कूल व्हॅनवर कठोर कारवाई केली आहे. तपासादरम्यान समोर आलेली माहिती आणखी गंभीर असून, ज्या व्हॅनमध्ये ही घटना घडली ती व्हॅन कोणतीही वैध परवानगी नसताना विद्यार्थ्यांची वाहतूक करत असल्याचं उघड झालं आहे. या गंभीर निष्काळजीपणाची दखल घेत RTO ने संबंधित व्हॅनचा परवाना रद्द केला असून 24 हजार रुपयांचा दंड ठोठावण्यात आला आहे.
ही घटना बदलापूर पश्चिमेकडील एका खासगी शाळेत शिकणाऱ्या चार वर्षांच्या चिमुकलीसोबत घडली. नेहमीप्रमाणे दुपारी शाळा सुटल्यानंतर ती स्कूल व्हॅनमधून घरी निघाली होती. मात्र, ठरलेल्या वेळेत ती घरी न पोहोचल्यामुळे आई चिंतेत पडली. वारंवार फोन केल्यानंतर सुमारे दीड तास उशिरा चिमुकली घरी परतली. ती अत्यंत घाबरलेली, शांत आणि अस्वस्थ अवस्थेत होती. आईने विचारपूस करताच, व्हॅन चालकाने तिच्या गुप्तांगाला हात लावल्याची धक्कादायक माहिती चिमुकलीने दिली. हे ऐकताच कुटुंबीयांनी तत्काळ पोलिस ठाण्यात धाव घेतली.
पालकांच्या तक्रारीनंतर पोलिसांनी तातडीने कारवाई करत संबंधित स्कूल व्हॅन चालकाला अटक केली. आरोपीविरोधात गंभीर कलमान्वये गुन्हा दाखल करण्यात आला असून पुढील तपास सुरू आहे. या घटनेमुळे बदलापूरसह कल्याण परिसरात तीव्र संतापाची लाट उसळली आहे. लहान मुलींच्या सुरक्षेचा प्रश्न पुन्हा एकदा ऐरणीवर आला असून, पालकांमध्ये भीती आणि संतापाचं वातावरण आहे. शाळेत पाठवलेली मुलं सुरक्षित हातात आहेत की नाही, असा प्रश्न अनेक पालक उपस्थित करत आहेत.
या प्रकरणाची गंभीर दखल घेत कल्याण RTO ने संबंधित स्कूल व्हॅनची चौकशी सुरू केली. तपासात समोर आलेल्या निष्कर्षांनी प्रशासनालाही धक्का बसला. ही स्कूल व्हॅन कोणतीही अधिकृत परवानगी न घेता विद्यार्थ्यांची वाहतूक करत होती. नियमांचे सर्रास उल्लंघन करत ही व्हॅन रस्त्यावर धावत असल्याचं स्पष्ट झालं. त्यामुळे RTO ने तात्काळ निर्णय घेत व्हॅनचा परवाना रद्द केला आणि 24 हजार रुपयांचा दंड ठोठावला. मुलांच्या सुरक्षिततेशी खेळणाऱ्यांवर कठोर कारवाई केली जाईल, असा इशाराही प्रशासनाने दिला आहे.
दरम्यान, या घटनेनंतर राजकीय प्रतिक्रिया देखील उमटल्या. अल्पवयीन मुलीवर अत्याचाराची बातमी समजताच राष्ट्रवादी काँग्रेस (अजित पवार गट) च्या महिला कार्यकर्त्यांनी बदलापूर पश्चिम पोलिस ठाण्यात धाव घेतली. यावेळी वातावरण प्रचंड तणावपूर्ण झालं होतं. राष्ट्रवादीच्या नेत्या संगीता चेंदवणकर यांनी संतप्त प्रतिक्रिया देत संबंधित स्कूल व्हॅनची तोडफोड करण्याचा प्रयत्न केला. काही काळासाठी परिसरात गोंधळाचं आणि तणावाचं वातावरण निर्माण झालं होतं, मात्र पोलिसांनी परिस्थिती नियंत्रणात आणली.
या घटनेमुळे शाळा व्यवस्थापन, स्कूल व्हॅन चालक आणि प्रशासन यांच्या भूमिकेवर गंभीर प्रश्नचिन्ह उपस्थित झाले आहे. विद्यार्थ्यांच्या वाहतुकीसाठी वापरण्यात येणाऱ्या वाहनांची तपासणी, चालकांची पार्श्वभूमी तपासणी आणि आवश्यक परवानग्या याबाबत प्रशासनाकडून पुरेशी दक्षता घेतली जाते का? असा सवाल उपस्थित केला जात आहे. बेकायदेशीरपणे सुरू असलेल्या अनेक स्कूल व्हॅन्समुळे विद्यार्थ्यांच्या सुरक्षिततेचा प्रश्न अधिक गंभीर बनत चालला आहे.
बदलापुरात पुन्हा एकदा चिमुकलीवर अत्याचाराची घटना घडल्यामुळे नागरिकांमध्ये तीव्र संताप आहे. प्रशासनाने केवळ एका व्हॅनवर कारवाई करून थांबू नये, तर परिसरातील सर्व बेकायदेशीर आणि नियमबाह्य स्कूल व्हॅन्सवर कठोर कारवाई करावी, अशी मागणी होत आहे. पुढील काळात प्रशासन अधिक कडक पावले उचलणार का, शाळा व्यवस्थापनाची जबाबदारी निश्चित केली जाणार का आणि अशा घटना रोखण्यासाठी ठोस उपाययोजना केल्या जाणार का, याकडे संपूर्ण बदलापूरसह राज्याचं लक्ष लागून राहिलं आहे.
