मुंबई- जुहू परिसरात मुक्तेश्वर रोडजवळ सोमवारी रात्री सुमारे 8.30 वाजता एक मोठा रस्ते अपघात झाला, ज्यात अक्षय कुमारच्या सुरक्षा वाहनाने ऑटो रिक्षाला धडक दिली.धडक इतकी जोरदार होती की ऑटो चालक आणि त्यात बसलेला एक प्रवासी गंभीर जखमी झाले. दोन्ही जखमींना तातडीने जवळच्या रुग्णालयात उपचारासाठी दाखल करण्यात आले.जखमी ऑटो-रिक्षा चालकाचा भाऊ मोहम्मद समीरने सांगितले की, रात्री सुमारे 8:30 वाजता त्याचा भाऊ ऑटो चालवत होता. त्याच्या मागे अक्षय कुमारची इनोव्हा कार आणि एक मर्सिडीज धावत होती. तेव्हा मर्सिडीजने इनोव्हाला धडक दिली आणि इनोव्हा पुढे जाऊन ऑटोला धडकली.
त्यानंतर ऑटो उलटला, ज्यामुळे त्याचा भाऊ आणि ऑटोमध्ये बसलेला एक प्रवासी ऑटोखाली अडकले. ऑटो पूर्णपणे तुटला आणि त्याच्या भावाची प्रकृती खूप गंभीर आहे.समीरने सांगितले की, त्यांची फक्त एवढीच मागणी आहे की, त्यांच्या भावावर योग्य उपचार व्हावेत आणि ऑटोचे जे नुकसान झाले आहे, त्याची भरपाई मिळावी. त्यांना याशिवाय दुसरे काहीही नको आहे.
अक्षय कुमार पत्नी ट्विंकल खन्नासोबत परदेश प्रवासाहून विमानतळावरून घरी परतत होते, असे सांगितले जात आहे. दोघेही पुढे चाललेल्या दुसऱ्या गाडीत बसले होते. अपघाताची माहिती मिळताच पोलीस घटनास्थळी पोहोचले आणि त्यांनी तपास सुरू केला. जुहू पोलिसांनी मर्सिडीज चालकाविरुद्ध निष्काळजीपणे गाडी चालवल्याचा गुन्हा दाखल केला आहे.
अपघाताचा व्हिडिओही समोर आला आहे, ज्यात अक्षयची गाडी ऑटोवर उलटलेली दिसत आहे. सोशल मीडियावर अपघाताचे अनेक व्हिडिओ व्हायरल होत आहेत. दिलासादायक बाब म्हणजे या अपघातात कोणाचाही जीव गेला नाही, मात्र अपघातात सहभागी असलेल्या सर्व गाड्यांचे मोठे नुकसान झाले.
या संपूर्ण प्रकरणावर अक्षय कुमारच्या टीमकडून अद्याप कोणतेही अधिकृत निवेदन जारी करण्यात आलेले नाही. सध्या या घटनेनंतर परिसरात काही काळ गोंधळाचे वातावरण होते, मात्र परिस्थिती लवकरच नियंत्रणात आणण्यात आली. चाहत्यांसाठी दिलासादायक बाब आहे की, अभिनेता आणि त्यांची पत्नी ट्विंकल या अपघातात सुखरूप आहेत.
