पुणे-कात्रजमधील आंबेगाव खुर्द परिसरात पतंग उडवताना इमारतीच्या सहाव्या मजल्यावरून पडून एका १२ वर्षीय मुलाचा मृत्यू झाला. या दुर्घटनेस जबाबदार धरून बांधकाम व्यावसायिकांविरुद्ध गुन्हा दाखल करण्यात आला आहे. इमारतीतील जिन्याला कठडे नसल्याने ही दुर्घटना घडल्याचे समोर आले आहे. इमारतीचे काम अर्धवट असल्याचे आणि जिन्यांना कठडे नसल्याचे उघड झाले. बांधकाम व्यावसायिकांच्या बेजबाबदारपणामुळे ही दुर्घटना घडल्याचे निष्पन्न झाल्यानंतर, योगेश शिळीमकर आणि महेश धूत या बांधकाम व्यावसायिकांविरुद्ध गुन्हा दाखल करण्यात आला आहे.
श्लोक नितीन बांदल (वय १२, रा. स्वरा क्लासिक इमारत, सिद्धिविनायक सोसायटी, आंबेगाव खुर्द, कात्रज) असे मृत्युमुखी पडलेल्या मुलाचे नाव आहे. श्लोक पाचवीत शिकत होता. त्याचे वडील एका खासगी कंपनीत कामाला आहेत. श्लोकचे मामा अमोल सुभाष इंगवले (वय ३५, रा. औदुंबर निवास, कात्रज गावठाण) यांनी आंबेगाव पोलिस ठाण्यात याप्रकरणी फिर्याद दिली आहे.
पोलिसांनी दिलेल्या माहितीनुसार, आंबेगाव खुर्द परिसरात एका गृहप्रकल्पाचे बांधकाम सुरू आहे. गुरुवारी (८ जानेवारी) सायंकाळी पाचच्या सुमारास श्लोक शाळा सुटल्यानंतर पतंग उडवण्यासाठी बांधकाम सुरू असलेल्या इमारतीत गेला होता. सहाव्या मजल्यावरून तोल जाऊन तो खाली पडला आणि गंभीर जखमी झाला. त्याला तातडीने रुग्णालयात दाखल करण्यात आले, परंतु उपचारापूर्वीच त्याचा मृत्यू झाल्याचे सहायक पोलिस निरीक्षक भोजलिंग दोडमिसे यांनी सांगितले.
या घटनेची माहिती मिळताच वरिष्ठ पोलिस निरीक्षक शरद झिने, गुन्हे शाखेचे निरीक्षक गजानन चोरमले आणि सहायक निरीक्षक भोजलिंग दोडमिसे यांनी घटनास्थळी भेट दिली. सहायक पोलिस निरीक्षक भोजलिंग दोडमिसे या प्रकरणाचा पुढील तपास करत आहेत.
