आरोप सिद्ध झाले तर राजकारणातून संन्यास घेईन!:नीलेश घायवाळ प्रकरणावरून मुरलीधर मोहोळांचे विरोधकांना खुले आव्हान
पुणे- महानगरपालिका निवडणुकीच्या रणधुमाळीत राजकीय आरोप-प्रत्यारोपांनी टोक गाठले आहे. कुख्यात गुंड नीलेश घायवाळ प्रकरणातील गुन्हेगारांना परदेशात पळून जाण्यासाठी मदत केल्याचा गंभीर आरोप भाजप नेते आणि केंद्रीय राज्यमंत्री मुरलीधर मोहोळ यांच्यावर करण्यात आला होता. अजित पवारांनी देखील मोहोळ यांच्यावर या संदर्भात टीका करत आरोप केला होता. या आरोपांमुळे पुण्याच्या राजकीय वर्तुळात मोठी खळबळ उडाली असून, आता स्वतः मुरलीधर मोहोळ यांनी यावर आक्रमक पवित्रा घेतला आहे. माझ्यावर झालेले आरोप सिद्ध करून दाखवा, जर ते सिद्ध झाले तर मी आजच राजकारणातून संन्यास घेईन, असे थेट आव्हान मोहोळ यांनी दिले आहे.
पुण्यातील गुन्हेगारी आणि टोळीयुद्ध हा नेहमीच चर्चेचा विषय राहिला आहे. नीलेश घायवाळ या कुख्यात गुंडाशी संबंधित काही गुन्हेगारांवर पोलिसांची कारवाई सुरू असताना, त्यांना देशाबाहेर पळून जाण्यासाठी मुरलीधर मोहोळ यांनी रसद पुरवली आणि राजकीय दबावाचा वापर करून मदत केली, असा खळबळजनक आरोप विरोधकांकडून करण्यात आला होता. गुन्हेगारांना कायदेशीर कचाट्यातून वाचवण्यासाठी मोहोळ यांनी आपले वजन वापरले आणि त्यांना विदेशात सुरक्षित स्थळी धाडण्यात महत्त्वाची भूमिका बजावली, असे या आरोपांचे स्वरूप आहे. निवडणुकीच्या काळात हा मुद्दा समोर आल्याने मोहोळ यांच्या प्रतिमेला धक्का लावण्याचा प्रयत्न विरोधकांकडून केला जात आहे.
या आरोपांना प्रत्युत्तर देताना मुरलीधर मोहोळ म्हणाले की, निवडणूक जवळ आली की अशा प्रकारचे बिनबुडाचे आणि खालच्या पातळीवरचे आरोप करणे ही विरोधकांची पद्धत झाली आहे. मी कोणत्याही गुन्हेगाराला कधीही मदत केलेली नाही. ज्यांनी माझ्यावर हे आरोप केले आहेत, त्यांना मी जाहीर आव्हान देतो की त्यांनी पुरावे समोर आणावेत. जर हे आरोप खरे ठरले तर मी राजकारणातून कायमची एक्झिट घेईन. मात्र, जर आरोप खोटे ठरले तर ज्यांनी हे आरोप केले आहेत, त्यांनी राजकारणातून संन्यास घेण्याची हिंमत दाखवावी, अशा शब्दांत त्यांनी आपला संताप व्यक्त केला.
मुद्दयाचे राजकारण करण्याऐवजी विरोधक वैयक्तिक चिखलफेक करत असल्याचे सांगत मोहोळ यांनी चर्चेचे निमंत्रण दिले आहे. या प्रकरणावर चर्चा करण्यासाठी मी कोणत्याही व्यासपीठावर यायला तयार आहे. विरोधकांनी समोरासमोर येऊन बोलावे आणि पुराव्यानिशी चर्चा करावी, असेही त्यांनी स्पष्ट केले. या आव्हानामुळे आता विरोधक यावर काय भूमिका घेतात, याकडे पुणेकरांचे लक्ष लागले आहे. गुन्हेगारीच्या मुद्द्यावरून पुण्याचे राजकारण आता अधिकच तापण्याची चिन्हे दिसत आहेत.
