.. पुणेकरांसाठी एकच सक्षम विरोधी पक्ष म्हणजे आम आदमी पार्टी.
कोयता गॅंग गुंडगिरीचे अपघातांचे पुणे शहर आणि कोंबड्यांची झुंज!
‘पुणे- हतबल पुणेकरांच्या समस्या हा कोंबड्याच्या झुंजी सारखा एंटरटेनमेंट चा प्रयोग नाही! त्यामुळे पुण्याचे माजी महापौर मुरलीधर मोहोळ आणि पालकमंत्री उपमुख्यमंत्री अजितदादा पवार यांनी एकमेकांवर आरोप करीत पुणेकरांसाठी नुरा कुस्तीचे शो करू नयेत! जर पुणेकरांच्या समस्यांची एवढी काळजी होती तर गेल्या आठ वर्षांमध्ये काय केले याचा हिशोब द्या. ‘अशी प्रतिक्रिया आम आदमी पार्टीचे राज्य प्रवक्ते मुकुंद किर्दत यांनी दिली आहे.
महानगरपालिका निवडणुकीच्या पार्श्वभूमीवर भाजपने भ्रष्टाचाराचा कळस गाठला आहे निविदा रक्कम फुगवून कामे लाटली जातात अगदी कचऱ्यातही भ्रष्टाचार केला जातो. महापालिका भ्रष्टाचाराने पोखरली गेली असून कर्जबाजारी झाली आहे अशी टीका अजित पवार यांनी केली होती. त्यावर उत्तर देताना पुणे शहरातील गुन्हेगारी संपली पाहिजे मात्र राष्ट्रवादी पक्षाची उमेदवारी यादी पाहिली तर ते कोणत्या तत्त्वांमध्ये बसते असा सवाल मुरलीधर मोहोळ यांनी केला होता.
या वादात आम आदमी पार्टीने आता उडी घेतली असून भाजपचे मुरलीधर मोहोळ आणि राष्ट्रवादीचे अजित दादा यांच्यामधील चिखलफेक म्हणजे नुरा कुस्ती आहे अशी टीका केली आहे. पिंपरी चिंचवड मधील स्थायी समितीच्या अध्यक्षांनी लाच मागितली होती आणि ते प्रकरण आम आदमी पार्टीने लावून धरले होते. तसेच मुरलीधर मोहोळ यांच्या मित्राचे जैन होस्टेल खरेदी प्रकरण, तर अजित दादा यांच्या मुलाचे मुंढवा जमीन प्रकरण याचाही पाठपुरावा आम आदमी पार्टीने केला होता. त्यामुळे सत्तेत एकमेकांच्या मांडीला मांडी लावून बसलेल्या अजितदादा आणि मुरलीधर मोहोळ यांनी आता निवडणुकीपुरते एकमेकावर चिखलफेक करणे म्हणजे नुरा कुस्ती आहे. सत्तेच्यासाठी झालेल्या सर्व युत्या आणि आघाड्या यांच्यापेक्षा आम आदमी पार्टी ही सातत्याने सामान्य माणसाच्या विकासावर काम करीत असून ट्रिपल इंजिन असलेल्या भाजपच्या भ्रष्टाचाराची पोलखोल करीत आली आहे असे आप चे मुकुंद किर्दत यांनी म्हटले आहे.
