पुणे-येरवडा कारागृहात एका कैद्यावर फरशीने जीवघेणा हल्ला करण्यात आला आहे. या प्रकरणी खुनाचा प्रयत्न केल्याचा गुन्हा दोन कैद्यांविरुद्ध दाखल करण्यात आला आहे. विशाल नागनाथ कांबळे (वय 28, रा. लक्ष्मीनगर, येरवडा) असे गंभीर जखमी झालेल्या कैद्याचे नाव असून, त्याच्यावर ससून रुग्णालयात उपचार सुरू आहेत.या प्रकरणी आकाश सतीश चंडालिया (वय 30, रा. जयजवाननगर, येरवडा) आणि दीपक संजय रेड्डी (वय 27, रा. इंद्रायणी कॉलनी, कामशेत) यांच्याविरुद्ध गुन्हा दाखल करण्यात आला आहे. कारागृह अधिकारी सचिन गुरव यांनी येरवडा पोलिस ठाण्यात याबाबत फिर्याद दिली आहे.
पोलिसांनी दिलेल्या माहितीनुसार, चंडालिया, रेड्डी आणि कांबळे हे तिघेही सराईत गुन्हेगार आहेत. चंडालियाला येरवडा भागातील एका खून प्रकरणात अटक करण्यात आली होती. हे तिघेही येरवडा कारागृहातील सी.जे. विभागातील बराक क्रमांक एकमध्ये एकत्र होते.
सोमवारी (15 डिसेंबर) सायंकाळी पावणेसातच्या सुमारास त्यांच्यात वाद झाला. या वादातून चंडालिया आणि रेड्डी यांनी कांबळे याच्या डोक्यात फरशीचा तुकडा घालून हल्ला केला. या मारहाणीत कांबळे गंभीर जखमी झाला.
आरडाओरडा ऐकून कारागृहातील रक्षकांनी तात्काळ घटनास्थळी धाव घेतली आणि आरोपी चंडालिया व रेड्डी यांना रोखले. जखमी अवस्थेतील कांबळे याला तातडीने रुग्णालयात दाखल करण्यात आले. घटनेची माहिती मिळताच येरवडा विभागाच्या सहायक पोलिस आयुक्त प्रांजली सोनवणे आणि वरिष्ठ पोलिस निरीक्षक अंजुम बागवान यांनी घटनास्थळी भेट दिली. सहायक निरीक्षक जराड या प्रकरणाचा पुढील तपास करत आहेत.
येरवडा कारागृहात यापूर्वीही किरकोळ वादातून कैद्यांमध्ये हाणामारीच्या घटना घडल्या आहेत. तसेच, कैद्यांकडून मोबाईल संच आणि अमली पदार्थ आणण्याचे गैरप्रकारही समोर आले होते. या गैरप्रकारांना आळा घालण्यासाठी कारागृहात सीसीटीव्ही कॅमेरे बसवण्यात आले होते, ज्यामुळे अशा घटनांमध्ये घट झाली होती.
