पुणे- महानगरपालिका निवडणुकीसाठी काँग्रेस पक्षाने तयारी सुरू केली आहे. पक्ष संघटनेने प्रत्येक प्रभागात बैठका घेतल्या असून, उमेदवारांची निवड प्रक्रिया सुरू आहे. पुणे शहर काँग्रेस अध्यक्ष अरविंद शिंदे यांनी पत्रकार परिषदेत सांगितले की, पक्षाकडे सर्व ठिकाणी उमेदवार उपलब्ध असून कार्यकर्त्यांमध्ये उत्साह आहे. आतापर्यंत 211 कार्यकर्त्यांनी पक्ष कार्यालयातून अर्ज नेले आहेत.जमिनी लाटणे आणि ठेकेदारी करणे एवढेच काम सत्ताधाऱ्यांनी जोरात केले .त्यामुळे यावेळी महापालिका जिंकणे अवघड आहे त्यामुळे मतदार यादीत घोळ करून ठेवला आहे. जो बालगुडे आणि अविनाश बागवे यांनी निदर्शनास आणून दिला आहे. शिंदे यांनी यावेळी मतदारयादीतील मोठ्या प्रमाणातील घोळावर गंभीर चिंता व्यक्त केली. ते म्हणाले की, मतदारयादी तयार करण्याच्या प्रक्रियेत भोंगळ कारभार सुरू असून, यात भाजपचा हस्तक्षेप आहे. हा घोळ अद्याप संपलेला नाही, असेही त्यांनी नमूद केले.
काँग्रेसने स्वबळावर आणि आघाडी करून निवडणूक लढवण्याची तयारी ठेवली आहे. आघाडीबाबतचा अंतिम निर्णय पक्षश्रेष्ठी घेतील, असे शिंदे यांनी स्पष्ट केले. या पत्रकार परिषदेला माजी गृहराज्यमंत्री रमेश बागवे, माजी आमदार दीप्ती चौधरी, ॲड. अभय छाजेड, संजय बालगुडे, प्रदेश वरिष्ठ प्रवक्ते गोपाळ तिवारी आणि कमल व्यवहारे, अविनाश बागवे, अजित दरेकर उपस्थित होते.
शिंदे यांनी महानगरपालिकेतील कारभारावरही टीका केली. मनपा अधिकारी पारदर्शकपणे काम करत नाहीत, अनेक अधिकाऱ्यांच्या बदल्या वारंवार होत असल्याने भ्रष्टाचार बोकाळला आहे, असे ते म्हणाले. मनपा हद्दीत समाविष्ट गावांमध्ये झाडांच्या जनगणनेसाठी 32 कोटी रुपये मंजूर करण्यात आले असून, नदी सुधार प्रकल्पातही गैरव्यवहार झाल्याचा आरोप त्यांनी केला. भाजपचे माजी सभागृह नेते पैसे गोळा करण्यासाठी प्रयत्न करत असून, मुख्यमंत्री देवेंद्र फडणवीस हेच या भ्रष्टाचाराचे मूळ असल्याचे शिंदे यांनी म्हटले.
यावेळी बोलताना संजय बालगुडे यांनी आरोप केला की, मनपा अधिकारी आणि भाजप पदाधिकाऱ्यांनी संगनमताने प्रारूप मतदारयादीत हस्तक्षेप करून गैरप्रकार केले आहेत. सीसीटीव्ही फुटेजमध्ये ही बाब दिसून आल्याचे त्यांनी सांगितले. याबाबत मनपा आयुक्तांना माहिती देण्यात आली आहे. कोणत्यातरी मंत्र्याचा दबाव असल्याशिवाय हे होऊ शकत नाही, असे बालगुडे म्हणाले. यात सहभागी असलेल्यांना तात्काळ निलंबित करून पारदर्शकपणे मतदारयादी तयार करावी, अशी मागणी त्यांनी केली.
