नागपूर – विधानसभेत 75 हजार 286 कोटी रुपयांची पुरवणी मागणी सादर करू त्यानंतर शोकप्रस्ताव संमत करत विधानसभा अध्यक्षांनी सभागृहाचे कामकाज दिवसभरासाठी स्थगित केले .
शिवाजीराव भानुदास कर्डिले, विधानसभा सदस्य व माजी राज्यमंत्री, महादेवराव सुकाजी शिवणकर, भारत राजाभाऊ बोंद्रे, माजी विधानसभा सदस्य व माजी मंत्री श्याम ऊर्फ जनार्दन बाळकृष्ण आष्टेकर, माजी विधानसभा सदस्य व माजी राज्यमंत्री यशवंत बाबाजी दळवी, नारायण नानू पटेल, सिद्रामप्पा मलकप्पा पाटील, गिल्बर्ट जॉन मेंडोन्सा, राजीव अनिल देशमुख, माजी विधानसभा सदस्य निर्मला शंकरराव ठोकळ यांच्या दुःखद निधनाबद्दल शोक प्रस्ताव मांडण्यात आला. यानंतर सभागृहाचे कामकाज स्थगित करण्यात आले.
विधानसभेत मांडण्यात आलेले शासकीय विधेयक
(१) सन २०२५ चे विधानसभा विधेयक क्रमांक ८९ – महाराष्ट्र दुकाने व आस्थापना (नोकरीचे व सेवाशर्तीचे विनियमन) (सुधारणा) विधेयक, २०२५
(२) सन २०२५ चे विधानसभा विधेयक क्रमांक ९२ महाराष्ट्र सार्वजनिक विश्वस्तव्यवस्था (दुसरी सुधारणा) विधेयक, २०२५
(३) सन २०२५ चे विधानसभा विधेयक क्रमांक ९३ – महाराष्ट्र कृषि उत्पन्न पणन (विकास व विनियमन) (सुधारणा) विधेयक, २०२५
(४) सन २०२५ चे विधानसभा विधेयक क्रमांक ९४ – महाराष्ट्र धारण जमिनींचे तुकडे पाडण्यास प्रतिबंध करण्याबाबत व त्यांचे एकत्रीकरण करण्याबाबत (सुधारणा) विधेयक, २०२५
(५) सन २०२५ चे विधानसभा विधेयक क्रमांक ९५ महाराष्ट्र सार्वजनिक विश्वस्तव्यवस्था (तिसरी सुधारणा) विधेयक, २०२५
(६) सन २०२५ चे विधानसभा विधेयक क्रमांक ९६ – महाराष्ट्र जन विश्वास (तरतुदींची सुधारणा) विधेयक, २०२५
(७) सन २०२५ चे विधानसभा विधेयक क्रमांक ९७ – महाराष्ट्र जमीन महसूल संहिता (दुसरी सुधारणा) विधेयक, २०२५
नागपूरमधील अधिवेशन विदर्भासाठी असल्यामुळे विदर्भ करारानुसार व्हायला पाहिजे. आज काही पुरवणी मागण्या सादर होतील, पण इतरही पुरवणी मागण्या आणि बिले आहेत. सरकारला अधिवेशन लवकर संपवण्याची येवढी घाई का आहे? असा सवाल करत काँग्रेसचे नेते आणि आमदार नाना पटोले यांनी अधिवेशनाचा कालावधी वाढवण्याची मागणी केली. मात्र, विधानसभा अध्यक्ष राहुल नार्वेकर यांनी ही मागणी फेटाळून लावली.
