ठाणे- आर्थिक विषमता , सामाजिक विषमता या बरोबर राज्यात वाढत्या गुन्हेगारीने हैदोस घातला आहे. आता ठाणे फॅमिली कोर्टाच्या आवारात माणुसकीला काळिमा फासणारी धक्कादायक घटना घडली आहे. ‘बर्थडे’ सेलिब्रेशनच्या बहाण्याने एका विवाहित महिलेला कारमध्ये बोलावून, तिला गुंगीचे औषध देऊन तिच्यावर सामूहिक बलात्कार करण्यात आला. पीडितेने तक्रार दाखल केल्यानंतर पोलिसांनी तात्काळ कारवाई करत सामूहिक बलात्काराचा गुन्हा दाखल केला असून, हिरालाल केदार या आरोपीला अटक करण्यात आली आहे. तर रवी पवार हा फरार आहे. पोलिस उपायुक्त सुभाष बुरसे यांच्या मार्गदर्शनाखाली पथके त्याचा शोध घेत आहेत. न्यायालयाच्या आवारातच अशी घटना घडल्याने सुरक्षा व्यवस्थेवरही प्रश्नचिन्ह उपस्थित होत आहे.
25 ऑगस्ट 2025 रोजी घडलेल्या या संतापजनक प्रकाराचा उलगडा तब्बल तीन महिन्यांनी झाला असून, पीडितेने हिंमत एकवटून तक्रार दाखल केल्यानंतर ठाणे नगर पोलिसांनी एका आरोपीला बेड्या ठोकल्या आहेत.पीडित विवाहितेने सोशल मीडियावर कामासंदर्भातील जाहिरात पाहिली होती. चांगल्या पगाराची नोकरी मिळेल या आशेने तिने संबंधित नंबरवर संपर्क साधला. संशयित आरोपींनी तिचा विश्वास संपादन करत तिला ठाण्यातील एका स्पा सेंटरमध्ये काम मिळवून दिले.घटनेच्या दिवशी, म्हणजेच 25 ऑगस्ट 2025 रोजी रात्री साडेआठच्या सुमारास एका आरोपीने स्पा सेंटरमध्ये जाऊन पीडितेकडून मसाज करून घेतला. त्यानंतर ‘आज माझा वाढदिवस आहे, केक कापायचा आहे’ असे सांगून तिला बाहेर उभा असलेल्या ‘इर्टिगा’ कारमध्ये बोलावले. आरोपींनी गाडी थेट ठाणे फॅमिली कोर्टाच्या अंधाऱ्या पार्किंगमध्ये नेली. तिथे केक कापताना त्यांनी त्यात आधीच गुंगीचे औषध मिसळले होते. हा केक खाल्ल्यानंतर पीडितेची शुद्ध हरपली. याच संधीचा फायदा घेत गाडीतील दोन्ही नराधमांनी तिच्यावर आळीपाळीने अत्याचार केला. इतकेच नाही, तर या पाशवी कृत्याचे त्यांनी मोबाईलमध्ये चित्रीकरणही केले.
रात्री 11 वाजता पीडितेला रस्त्यावर सोडून देताना, “वाच्यता केलीस तर व्हिडिओ व्हायरल करू,” अशी धमकी आरोपींनी दिली. बदनामीच्या भीतीने पीडितेने तीन महिने हे दुःख मनात दाबून ठेवले. मात्र, आरोपींनी या व्हिडिओचा आधार घेत तिला सातत्याने ब्लॅकमेल करणे सुरूच ठेवले. अखेर हा त्रास सहन न झाल्याने पीडितेने 5 डिसेंबर 2025 रोजी एका वकिलाच्या आणि मैत्रिणीच्या मदतीने ठाणे नगर पोलिस ठाणे गाठले आणि आपबीती सांगितली.
