साहित्यप्रेमी भगिनी मंडळाच्या हीरक महोत्सवी वर्षाची होणार सांगता
पुणे : स्त्रियांच्या साहित्यावर सातत्याने अभ्यास करणारी साहित्यिक व सांस्कृतिक संस्था असा लौकिक संपादन केलेल्या साहित्यप्रेमी भगिनी मंडळ या संस्थेच्या हीरक महोत्सवी वर्षाची सांगता 41व्या स्त्री साहित्य संमेलनाने होत आहे. संमेलन रविवार, दि. 30 नोव्हेंबर 2025 रोजी पुण्यात आयोजित करण्यात आले आहे. संमेलनाचे अध्यक्षस्थान हिंदी साहित्य अकादमी पुरस्काराने सन्मानित प्रसिद्ध कवयित्री, समीक्षक, विचारवंत डॉ. सविता सिंह भूषविणार आहेत.
संमेलन सकाळी 9 ते सायंकाळी 5 या कालावधीत मराठा चेंबर ऑफ कॉमर्स ॲण्ड इंडस्ट्रीज, टिळक रोड येथे आयोजित करण्यात आले आहे, अशी माहिती साहित्यप्रेमी भगिनी मंडळाच्या, ज्येष्ठ कवयित्री अध्यक्ष अंजली कुलकर्णी व कार्यवाह शलाका माटे यांनी निवेदनाद्वारे कळविली आहे.
संमेलनाचे उद्घाटन मराठवाडा मित्र मंडळ संस्थेचे कार्याध्यक्ष प्राचार्य भाऊसाहेब जाधव यांच्या हस्ते होणार असून ज्येष्ठ अनुवादक डॉ. उमा कुलकर्णी यांची प्रमुख उपस्थिती असणार आहे. साहित्य अकादमी पुरस्कारप्राप्त लेखिकांच्या कलाकृतींचा रसास्वाद मांडणाऱ्या ‘सप्तधारा’ या ग्रंथाचे प्रकाशन साहित्यप्रेमी भगिनी मंडळाचा संशोधन विभाग व संस्कृती प्रकाशन यांच्या संयुक्त विद्यमाने होणार आहे. या वेळी ज्येष्ठ लेखिकांचे प्रातिनिधीक सत्कार तसेच वार्षिक पुरस्कारांचे वितरण होणार आहे.
दुसऱ्या सत्रात प्राचार्य डॉ. हे. वि. इनामदार यांच्या जन्मशताब्दीनिमित्त ‘कृत्रिम बुद्धिमत्ता आणि मानवी जीवन’ या विषयावर परिसंवाद आयोजित करण्यात आला असून यात डॉ. दीपक शिकारपूर आणि डॉ. सुजाता महाजन यांचा सहभाग असणार आहे. त्यांच्याशी डॉ. प्रांजली देशपांडे संवाद साधणार आहेत.
प्रबंध एकादशी समिती पुरस्कृत डॉ. ह. वि. सरदेसाई पुरस्काराने प्रा. डॉ. आशालता कांबळे यांना गौरविले जाणार आहे.
तिसऱ्या सत्रात ज्येष्ठ साहित्यप्रेमी भगिनींचा सत्कार करण्यात येणार आहे. त्यांनतर ज्येष्ठ लेखक, अभिनेते अभिराम भडकमकर यांच्या मुलाखतीचा कार्यक्रम आयोजित करण्यात आला असून त्यांच्याशी शैला मुकुंद संवाद साधणार आहेत.
‘गोष्टीवेल्हाळ तात्या’ या कार्यक्रमात ज्येष्ठ लेखक व्यंकटेश माडगुळकर यांच्या कथांचे अभिवाचन अक्षय वाटवे आणि सहकारी करणार आहेत. संमेलनाच्या समारोप समारंभास डॉ. कीर्ती मुळीक असणार आहेत.
संमेलन सर्वांसाठी खुले आहे.
डॉ. सविता सिंह यांच्याविषयी ..
डॉ. सविता सिंह यांनी दिल्ली विद्यापीठातून राज्यशास्त्रात एम.ए., एम.फिल., पी. एच.डी. केली आहे. मॉन्ट्रियाल (कॅनडा) येथील मॅकगिल विद्यापीठात त्यांनी साडेचार वर्षे संशोधन आणि अध्यापनाचे काम केले. ‘भारतात आधुनिकतेचा विमर्श’ हा त्यांच्या संशोधनाचा विषय होता. सध्या त्या इंदिरा गांधी राष्ट्रीय मुक्त विद्यापीठात प्रोफेसर आणि स्कूल ऑफ जेंडर अँड डेव्हलपमेंट स्टडीजच्या संस्थापक संचालक म्हणून कार्यरत आहेत. अमेरिकेच्या आंतरराष्ट्रीय हर्बर्ट मारक्यूस सोसायटीच्या संचालक मंडळाच्या सदस्या आणि को-चेअर आहेत.
प्रकाशित कविता संग्रह : अपने जैसा जीवन, नींद थी और रात थी, स्वप्न समय, खोई चीज़ों का शोक.
द्विभाषिक काव्यसंग्रह : रोविंग टुगेदर (इंग्रजी-हिंदी) आणि ज स्वी ला मेजों दे जेत्वाल (फ्रेंच-हिंदी).
राजकीय तत्त्वज्ञानाच्या क्षेत्रात रियलिटी अँड इट्स डेप्थ : ए कन्वर्सेशन बिटवीन सविता सिंह अँड रॉय भास्कर प्रकाशित.
आधुनिकता, भारतीय राजकीय सिद्धांत आणि भारतातील नारीवाद अशा विषयांवर तीन मोठ्या प्रकल्पांवर त्यांचे काम सुरू आहे.
पुरस्कार : हिंदी अकादमी आणि रजा फाउंडेशन व्यतिरिक्त महादेवी वर्मा पुरस्कार. युनिस डी सूजा अवॉर्ड आणि केदार सन्मान.
