मुंबई-सिने अभिनेते अशोक सराफ यांच्या पत्नी निवेदिता सराफ यांनी बिहारमधील भाजप-जदयु महायुतीच्या दैदिप्यमान विजयावर आनंद व्यक्त केला आहे. मी कट्टर भाजप समर्थक असल्यामुळे मला बिहारमधील एनडीएच्या विजयाचा फारच आनंद झाला, असे त्यांनी म्हटले आहे. त्यांच्या या विधानाची राज्याच्या राजकीय, सामाजिक व कला क्षेत्रात खमंग चर्चा रंगली आहे.कॉंग्रेस आणि शिवसेनेच्या ठाकरे गटाच्या नेत्यांनी आणि माणसे मधून याची तीव्र प्रतिक्रिया उमटते आहे, यांचे कसे ,’भेळ तिथे खेळ असतोय ..उद्या भाजपा कोसळू द्यात हे सारे म्हणतील भाजपचा आमचा काहीच संबध नव्हता , ते मिडिया वाले आपले काहीही छापत होते .
ठाण्यात आयोजित एका कार्यक्रमात निवेदिता सराफ यांना गंधार गौरव पुरस्कार प्रदान करण्यात आला. हा पुरस्कार त्यांना त्यांचे पती व ज्येष्ठ अभिनेते अशोक सराफ यांच्या हस्ते प्रदान करण्यात आला. यावेळी बोलताना त्यांनी वरील विधान केले. निवेदिता सराफ पुढे म्हणाल्या, आज मी जे काही आहे ते माझे गुरू, माझे पती अशोक सराफ यांच्यामुळे आहे. त्यामुळे त्यांच्याच हस्ते मला हा पुरस्कार दिला गेला याचा मला मनस्वी आनंद आहे.
माझ्या अभिनय कारकिर्दीची सुरुवात ही बालनाट्यापासून झोाली. सुधा करमरकर या माझ्या पहिल्या गुरू होत्या. त्यांच्या संस्थेतर्फे मी अनेक बालनाट्यांमध्ये काम केले. त्यानंतर अमृतवेल व बंध रेशमाचे या खूप मोठ्या नाटकांम्ध्येही मी काम केले. सुधा ताईंनी मला खऱ्या अर्थाने रंगमंचावर उभे राहायला शिकवले. त्या काळात रत्नाकर मतकरी व सुधाताई सातत्याने बालनाट्य रंगमंचावर आणत होत्या. त्यांचे महाराष्ट्रभर दौरे असायचे. बालनाट्यामुळे उद्याचे प्रेक्षक घडतात. त्यामुळे बालनाट्यांची शिबिरे आयोजित करणे खूप महत्त्वाचे आहे. यासाठी माझी मदत करण्याची तयारी आहे, असेही त्या यावेळी बोलताना म्हणाल्या.
महेश कोठारेंनीही केले होते भाजपचे समर्थन
उल्लेखनीय बाब म्हणजे मराठी कलाकारांनी भाजप व पंतप्रधान नरेंद्र मोदी यांचे कौतुक करण्याची ही काही पहिलीच वेळ नाही. यापूर्वी अभिनेते तथा दिग्दर्शक महेश कोठारे यांनीही पंतप्रधान मोदींचे तोंड भरून कौतुक केले होते. भाजपा म्हणजे आपले घर आहे. कारण, मी स्वतः भाजपचा भक्त आहे. पंतप्रधान नरेंद्र मोदींचा भक्त आहे, असे ते म्हणाले होते. त्यांच्या या टीकेनंतर शिवसेना उद्धव बाळासाहेब ठाकरे पक्षाचे खासदार संजय राऊत यांनी त्यांना खोचक टोला हाणला होता.
महेश कोठारे हे नक्की मराठीच आहेत ना? मला शंका वाटते. ते कोणत्याही पक्षाचे असू द्या. प्रत्येकाला आपले मत व्यक्त करण्याचा अधिकार आहे. पण तुम्ही कलाकार आहात. तुमचे सिनेमे फक्त भाजपच्या लोकांनी पाहिलेले नाहीत. त्यामुळे तुम्ही असे काही बोलला तर तात्या विंचू तुम्हाला चावेल. रात्री येऊन तुमचा गळा दाबेल, असे संजय राऊत म्हणाले होते. ठाकरे गटाच्या उपनेत्या किशोरी पेडणेकर यांनीही या प्रकरणी महेश कोठारेंवर निशाणा साधला होता. महेश कोठारे यांनी आपल्या सुनेला अपघात प्रकरणातून वाचवण्यासाठी भाजप व पंतप्रधान नरेंद्र मोदी यांची स्तुती केल्याचा दावा त्यांनी केला होता.
स्थानिक स्वराज्य संस्थांच्या आगामी निवडणुकांमुळे अवघ्या राज्याचे राजकारण तापले आहे. त्यातच बिहार विधानसभा निवडणुकीत एनडीएचा मोठा विजय झाल्यामुळे विरोधकांच्या तिळपापड झाला आहे. त्यांनी या प्रकरणी ईव्हीएम व कथित मतचोरीला दोष दिला आहे. या पार्श्वभूमीवर ज्येष्ठ अभिनेते अशोक सराफ यांच्या पत्नी निवेदिता सराफ यांनी भाजपच्या बिहारमधील विजयावर आनंद व्यक्त केला आहे. ‘व्यासपीठावर उपस्थित सगळे मान्यवर, आमदार संजय केळकर तुम्हा सर्वांचे बिहार विधानसभा निवडणुकीत विजय झाल्याबद्दल खूप खूप अभिनंदन. मी जरा कट्टर बीजेपी असल्यामुळे मला फारच आनंद झाला आहे’, असे त्या म्हणाल्या.
