पुणे – सोलापूर रस्त्यावरील शेवाळेवाडी गावातील भवरावस्ती या ठिकाणी काल दुपारी दीडच्या सुमारास बिबट्या रस्ता ओलांडत असताना स्थानिक तरुणांना दिसला आणि त्याची माहिती मिळताच हडपसर पोलीस ठाण्यातील अधिकारी संजय मोगले , पुणे वनपाल शितल खेंडके, मांजरीचे पीएसआय महेश कवळे, विजयकुमार ढाकणे व त्यांचा सर्व स्टाफ तसेच वनरक्षक प्रिया अकेन यांनी द्राक्ष बागायतदार संघाच्या परिसरातील भवरा वस्ती या ठिकाणी , बिबट्याचा वावर असणाऱ्या या परिसरात पाहणी करून त्याचे ठसे मिळविल्याची माहिती भाजपचे स्थानिक कार्यकर्ते राहुल रामचंद्र शेवाळे यांनी येथे दिली
ते म्हणाले,’ बिबट्या या परिसरात असल्याची शक्यता निर्माण झाली आहे , मात्र लोकांनी घाबरून न जाता दक्षता घ्यावी ,खबरदारी म्हणून तातडीने कॅमेरे लावून आवश्यकता भासल्यास पिंजरा लावण्याची मागणी आम्ही यावेळी वनाधिकाऱ्यांच्याकडे केली आहे , हा बिबट्या आता द्राक्ष बागातदार संघाच्या परिसरात असल्याची खात्रीलायक माहिती तेथील महिला कामगारांनी दिली, तसेच काल रात्री अकरा वाजता हिंगणे वस्ती या ठिकाणीही काही महिलांनी हाच बिबट्या पाहिला होता, या निमित्ताने परिसरातील सर्व नागरिकांनी खबरदारी घेणे खूप महत्त्वाचे आहे ,शक्यतो रात्री कुणीही बाहेर पडू नये असे आवाहन वन अधिकारी व पोलिसांच्या वतीने करण्यात आले आहे, बिबट्याच्या पुन्हा काही हालचाली दिसल्यास त्वरित 9881649090, 9371191 757 या क्रमांकावर संपर्क साधावा असे आवाहन देखील त्यांनी केले आहे.
आम्हाला परिसरात कुठलेही ठसे मिळाले नाहीत. नागरिकांच्या सांगण्यावरून माहिती घेतली जात आहे. आजही परिसरात वरिष्ठ अधिकाऱ्यांसह पाहणी केली आहे. नागरिकांनी घाबरून न जाता काळजी घ्यावी. अफवांवर विश्वास ठेवू नये.’ :सुरेश वरक, वनपरिक्षेत्र अधिकारी
