मुंबई : राज्यात सार्वत्रिक निवडणुकांचे वारे वाहत असताना आचारसंहिते ऐवजी ED,CBI, IT यांची जास्त चर्चा रंगणार कि काय ? असा प्रश्न आता उपस्थित होत असताना मागील काही दिवसांपासून विविध प्रशासकीय अधिकाऱ्यांच्या घरांवर आयकर विभागाच्या धाडींचं सत्र सुरू झाल्यावर आता राजकीय नेतेही टार्गेटवर असल्याचं पाहायला मिळत आहे. मनसे अध्यक्ष राज ठाकरे यांचे विश्वासू नेते अशी ओळख असणारे माजी आमदार राजू पाटील यांचे धाकटे बंधू विनोद पाटील यांच्या बंगल्यावर आयकर विभागाने धाड टाकली आहे. या धाडीमुळे राजकीय वर्तुळात खळबळ उडाली आहे.
मिळालेल्या माहितीनुसार, मंगळवारी रात्री उशिरा आयकर विभागाचे पथक विनोद पाटील यांच्या बंगल्यावर दाखल झाले होते. मात्र रात्री घरात शिरण्यास त्यांना प्रतिबंध करण्यात आला. अखेर आयकर विभागाचे अधिकारी आज सकाळी 6 वाजण्याच्या सुमारास घरात शिरले आणि त्यानंतर घरात तपासणी सुरू केली आहे. मागील जवळपास 10 तासापासून विनोद पाटील आणि त्यांच्या कुटुंबियांची चौकशी सुरू असल्याचे समजते. या धाडीत अधिकाऱ्यांच्या हाती महत्त्वाची कागदपत्रे लागतात का, हे पाहणं महत्त्वाचं ठरणार आहे.
राजू उर्फ प्रमोद रतन पाटील हे मनसे पक्षाचे 2019 च्या विधानसभा निवडणुकीत निवडून आलेले एकमेव विधानसभा उमेदवार होते. राजू पाटील यांचा जन्म 1973 साली झाला असून ते महाराष्ट्र नवनिर्माण सेनेचे अध्यक्ष राज ठाकरे यांचे अत्यंत विश्वासू नेते म्हणून ओळखले जातात. 2010 साली पाटील यांनी आपल्या राजकीय प्रवासाला सुरुवात केली. 2010 मध्ये झालेल्या कल्याण-डोंबिवली महानगरपालिका निवडणुकीमध्ये त्यांनी मनसेकडून प्रमुख भूमिका बजावली होती. मनसेने त्यावेळेस 29 जागा जिंकल्या होत्या. यात राजू पाटील यांचा मोठा वाटा असल्याचं बोललं जातं. राजू पाटील यांनी 2009 साली ठाणे जिल्हा परिषदेची निवडणूक लढवण्याचा निर्णय घेतला आणि त्यांची बिनविरोध निवड करण्यात आली. 2012 पर्यंत त्यांनी जिल्हापरिषद सदस्याची जबाबदारी सांभाळली होती. 2019 च्या विधानसभा निवडणुकीत कल्याण ग्रामीण विधानसभा मतदारसंघातून राजू पाटील यांनी शिवसेनेच्या रमेश म्हात्रे यांचा पराभव करत पहिल्यांदा आमदार म्हणून निवडून आले होते.
