पुणे-गणेशखिंड रोडवरील एका मॉलमधील लिफ्टमध्ये अडकलेल्या जखमी महिलेला मदत न केल्याप्रकरणी शिवाजीनगर पोलिसांनी सेंट्रो मॉलच्या प्रशासनाविरुद्ध गुन्हा दाखल केला आहे.
याबाबत शिवाजीनगर येथील एका ५५ वर्षाच्या महिलेने शिवाजीनगर पोलीस ठाण्यात फिर्याद दिली आहे. त्यावरुन पोलिसांनी सतप्रित आवस्थी, परवेंदर कुमार, पराग हार्डे, अभिजित कोल्हटकर या मॉलचे प्रशासकीय अधिकारी व लिफ्टची देखभाल करणार्यांविरुद्ध गुन्हा दाखल केला आहे. हा प्रकार सेंट्रो मॉलमध्ये १२ ऑक्टोंबर रोजी सायंकाळी ६ ते ९ वाजेच्या दरम्यान घडला होता.पोलिसांनी दिलेल्या माहितीनुसार शिवाजीनगर येथे राहणार्या महिला त्यांच्या दोन नातेवाईकांसह दिवाळीनिमित्त खरेदीसाठी गणेशखिंड रोडवरील सेंट्रो मॉलमध्ये गेल्या होत्या. लिफ्टमधून जात असताना अचानक लिफ्ट बंद पडली. महिला आणि नातेवाईक लिफ्टमध्ये अडकले. त्यांनी लिफ्टमधून बाहेर पडण्याचा प्रयत्न केला. तेव्हा महिलेबरोबर असलेल्या एका नातेवाईकाने लिफ्टच्या काचेवर हात मारला. काचेचा तुकडा उडल्याने महिलेच्या कपाळाला जखम झाली. महिला जखमी झाल्यानंतर लिफ्टची देखभाल करणारे कर्मचारी आणि मॉलच्या प्रशासन विभागातील अधिकारी, कर्मचारी तेथे आले नाही, असे महिलेने फिर्यादीत म्हटले आहे.निष्काळजीपणा, तसेच हयगयीचे कृत्य केल्याप्रकरणी शिवाजीनगर पोलिसांनी गुन्हा दाखल केला असून पोलीस उपनिरीक्षक शिंदे तपास करीत आहेत.
