पुणे–शिवसेना (ठाकरे गट) उपनेत्या सुषमा अंधारे यांनी फलटण येथील शासकीय रुग्णालयातील महिला डॉक्टरच्या मृत्यूबाबत गंभीर आरोप केला आहे. त्यांनी हा मृत्यू आत्महत्या नसून हत्या असल्याचा दावा केला. माजी खासदार रणजितसिंह निंबाळकर यांच्या दबावामुळेच हा प्रकार घडल्याचे अंधारे यांनी म्हटले आहे.
सोमवारी पुण्यात आयोजित पत्रकार परिषदेत बोलताना अंधारे यांनी मुख्यमंत्री देवेंद्र फडणवीस यांनी निंबाळकर यांना ‘क्लीन चिट’ कशी दिली, असा प्रश्न उपस्थित केला. त्यांनी माजी खासदार रणजितसिंह निंबाळकर, महिला डॉक्टरला त्रास देणारे पोलीस अधिकारी आणि निंबाळकर यांच्या दोन स्वीय सहाय्यकांची सखोल चौकशी करण्याची मागणी केली. या प्रकरणातील ‘गौडबंगाल’ पाहता उच्च न्यायालयाने यासाठी समिती स्थापन करावी, अशी मागणीही त्यांनी केली.
सातारा जिल्ह्यातील फलटण येथील शासकीय रुग्णालयातील एका महिला डॉक्टरने काही दिवसांपूर्वी आत्महत्या केल्याची घटना घडली होती. या प्रकरणात भाजप नेते आणि माजी खासदार रणजितसिंह निंबाळकर यांचा सहभाग असल्याचा आरोप होत आहे. मात्र, फलटण येथे रविवारी झालेल्या सभेत मुख्यमंत्री देवेंद्र फडणवीस यांनी निंबाळकर यांना ‘क्लीन चिट’ दिली होती. या पार्श्वभूमीवर अंधारे यांनी ही पत्रकार परिषद घेतली.
अंधारे यांनी निंबाळकर यांच्यावर अनेक गंभीर आरोप केले. बीड जिल्ह्यातील ऊसतोड कामगारांना त्यांच्या साखर कारखान्यासाठी आणले जात होते. कामगार कारखाना सोडून जाऊ नयेत म्हणून त्यांना मारहाण केली जात होती. फलटण पोलीस ठाण्यातील अधिकाऱ्यांच्या मदतीने कामगारांवर खोटे गुन्हे दाखल केले जात होते. सरकारी दवाखान्यात त्यांना दाखल करून कामगार ‘फिजिकली फिट’ असल्याचे दाखवण्यासाठी संबंधित महिला डॉक्टरवर दबाव टाकला जात होता. यासंदर्भात संबंधित महिला डॉक्टरने वरिष्ठांना चार पानी पत्र दिले होते.
डॉक्टरच्या कुटुंबीयांनी दावा केला आहे की, आत्महत्येवेळी तिच्या हातावर लिहिलेला मजकूर तिचे हस्ताक्षर नाही. फलटण येथे घर असतानाही, घटनेपूर्वी ही महिला निंबाळकर यांच्या निकटवर्तीयाच्या हॉटेलवर गेली होती. ती तिथे का गेली, याची चौकशी झाली पाहिजे, असे अंधारे यांनी सांगितले. हा सर्व प्रकार संशयास्पद असल्याचे त्यांचे म्हणणे आहे.
अंधारे यांनी पुढे सांगितले की, रणजितसिंह निंबाळकर भाजपमध्ये गेल्यानंतर २०२२ पासून पोलिसांनी हाताशी धरून २७७ तक्रारी केल्या आहेत. त्यानुसार पोलिसांनी संबंधितांना त्रास दिला आणि एफआयआर नोंदवले आहेत. निंबाळकर फडणवीसांच्या जीवावर ‘उड्या मारत’ असून, त्यातूनच त्यांना ‘क्लीन चिट’ देण्यात आली आहे, असा आरोपही अंधारे यांनी केला. पत्रकार परिषदेला शहरप्रमुख गजानन थरकुडे आणि प्रसिद्धी प्रमुख अनंत घरत उपस्थित होते. निंबाळकर यांच्या त्रासाला कंटाळून आत्महत्या करण्याचा प्रयत्न केलेल्या फलटण येथील एका कुटुंबातील महिला सदस्यही यावेळी उपस्थित होत्या आणि त्यांनीही निंबाळकर यांच्यावर आरोप केले.
