मुंबई-काँग्रेस, राष्ट्रवादी काँग्रेस, शिवसेना (उद्धव बाळासाहेब ठाकरे), मनसे (महाराष्ट्र नवनिर्माण सेना), शेकापसह इतर पक्षांच्या नेत्यांनी आज पुन्हा एकदा निवडणूक आयोगाची भेट घेऊन चर्चा केली. यावेळी बैठकीत ठाकरे बंधुंनी निवडणूक अधिकाऱ्यांवर प्रश्नांची सरबत्ती करत त्यांची कोंडी केली. विशेषतः मतदार यादीतील गोंधळावरून आयुक्तांना आणि अधिकाऱ्यांना चांगलेच धारेवर धरले. यावेळी महाराष्ट्र राज्य निवडणूक आयोगाच्या अधिकाऱ्यांची विरोधी पक्षाच्या शिष्टमंडळासमोर बोलती बंद झाल्याचे दिसून आले.
राज ठाकरे यांनी निवडणूक आयोगाला सुनावले की, ‘सर्व राजकीय पक्षांचे एकमत होत नाही, तोपर्यंत निवडणूक घेऊ नका. तुम्ही सत्तेतील तीन पक्षांसाठी काम करत नाही,’ असे ते म्हणाले. ‘आमचं-तुमचं करू नका, आमच्यासाठी निवडणूक आयोग एकच आहे. राजकीय पक्षांचे समाधान झाल्याशिवाय निवडणूक घेऊ नका,’ अशी मागणी करत त्यांनी निवडणूक कार्यक्रम रद्द करण्याची मागणी केली.
यादरम्यान, उद्धव ठाकरे यांनी निवडणूक आयोगाला ‘सत्य स्वीकारा आणि निवडणूक रद्द करा,’ असे सांगितले. VVPAT वापरले नाही, तर सर्व पुरावे नष्ट होतील, असा गंभीर आरोप त्यांनी केला. ‘निवडणूक आयोग काही हरिश्चंद्र नाही. VVPAT नसेल तर बॅलेटवर निवडणूक घ्या,’ अशी मागणी त्यांनी केली.
यानंतर राज ठाकरे म्हणाले की, ‘बॅलेटवर निवडणूक घेतल्यास जास्त दिवस लागत असतील तर लागू देत. निवडणूक आयोगाला निवडणुका घेण्याव्यतिरिक्त काय काम आहे?’ असा थेट सवाल त्यांनी केला. ‘पाच वर्षे निवडणूक घेतली नाही, अजून सहा महिने निवडणूक घेऊ नका. तुम्ही राजकीय पक्षांसाठी, सत्ताधाऱ्यांसाठी काम करत असल्याचे दिसते,’ असा गंभीर आरोपही त्यांनी केला.
राज ठाकरे यांनी यावेळी बाळासाहेब थोरात यांचे उदाहरण दिले की, थोरात आठ वेळा 80 ते 90 हजार मतांनी निवडून येतात, पण यावेळी लाखाने कसे पडले? हे कसे शक्य आहे, असा सवाल केला. या प्रश्नावर निवडणूक आयोगाचे अधिकारी निरुत्तर झाले. ‘मतदार यादीत घोळ असेल तर सुप्रीम कोर्टाला तयारी नसल्याचे सांगा आणि निवडणूक पुढे ढकला,’ असे ते म्हणाले.
यावेळी उद्धव ठाकरे यांनी निवडणूक आयोगाला चांगलेच झापले आहे. राज्याचे मुख्य निवडणूक अधिकारी एस. चोक्कलिंगम म्हणतात की काही जबाबदारी आमच्याकडे नाही, राज्य निवडणूक आयोग म्हणतं आमच्याकडे नाही. आम्ही कुणाशी बोलू? असा संतप्त सवाल उद्धव ठाकरे यांनी केला.
उद्धव ठाकरे यांनी निवडणूक आयोगाला झापताना म्हटले की, राज्याचे मुख्य निवडणूक अधिकारी एस. चोक्कलिंगम म्हणतात की काही जबाबदारी त्यांच्याकडे नाही, राज्य निवडणूक आयोग म्हणतो आमच्याकडे नाही. ‘आम्ही कुणाशी बोलू?’ असा संताप त्यांनी व्यक्त केला.
‘जर त्रुटींसह निवडणुका घ्यायच्या असतील, तर कशाला घेता? त्यापेक्षा थेट ‘ठराविक लोकांसाठी घेतलेली निवडणूक’ असे जाहीर करून टाका,’ अशा शब्दांत उद्धव ठाकरे यांनी निवडणूक प्रक्रियेवर प्रश्नचिन्ह उभे केले.
या बैठकीत विरोधी पक्षांच्या नेत्यांनी मतदार यादीतील गोंधळावर अनेक मुद्दे मांडले. बाळासाहेब थोरात म्हणाले की, विधानसभा निवडणुकीदरम्यान सांगितलेल्या त्रुटींवर काम झाले नाही, आणि आता स्थानिक स्वराज्य संस्था निवडणुकांबाबतही अनेक तक्रारी आहेत. जितेंद्र आव्हाड यांनी दुबार मतदारांवर बोट ठेवत, ‘तुमची यंत्रणा सज्ज नाही,’ अशी तक्रार केली.
