आंबेगाव पठार भागात गुन्हेगारीचे वाढते साम्राज्य
पुणे–भारती विद्यापीठ पोलिसांनी ब्युटी पार्लरमध्ये कामाचे आमिष दाखवून तरुणींना वेश्याव्यवसायात ढकलणाऱ्या एका दलालाला अटक केली आहे. या कारवाईत पश्चिम बंगालमधील दोन तरुणींची सुटका करण्यात आली. दोन वर्षांच्या छळानंतर संधी मिळताच तरुणींनी पोलिस नियंत्रण कक्षाला माहिती दिली, त्यानंतर पोलिसांनी छापा टाकून त्यांना सोडवले.राजू चिद्रवार-पाटील (वय २५, रा. आंबेगाव पठार, धनकवडी) असे अटक केलेल्या दलालाचे नाव आहे. त्याची पत्नी मीरा हिच्याविरुद्धही गुन्हा दाखल करण्यात आला असून, ती फरार आहे. एका २२ वर्षीय तरुणीने भारती विद्यापीठ पोलिस ठाण्यात या संदर्भात फिर्याद दिली आहे. आरोपी राजू आणि त्याची पत्नी मीरा यांनी पश्चिम बंगालमधील दोन तरुणींना पुण्यात ब्युटी पार्लरमध्ये नोकरी देण्याचे आमिष दाखवले होते.
या तरुणींना पश्चिम बंगालमधील त्यांच्या गावातून पुण्यात आणण्यात आले. मात्र, त्यांना ब्युटी पार्लरमध्ये काम न देता वेश्याव्यवसाय करण्यास भाग पाडले. तरुणींनी नकार दिल्यावर त्यांना डांबून ठेवले, धमकावले, शिवीगाळ केली आणि मारहाण करून त्यांचा छळ केला. त्यांना उपाशीही ठेवण्यात आले होते. आरोपी त्यांच्याकडून वेश्याव्यवसाय करवून पैसे घेत होते.
गेल्या आठवड्यात आंबेगाव पठार भागात आणलेल्या एका तरुणीने संधी साधून तिच्या मोबाईलवरून पुणे पोलिसांच्या नियंत्रण कक्षात संपर्क साधला. या माहितीनंतर भारती विद्यापीठ पोलिस ठाण्याचे वरिष्ठ पोलिस निरीक्षक राहुलकुमार खिलारे यांनी तपास पथकाला तरुणीचा शोध घेण्याचे आदेश दिले. पोलिसांनी छापा टाकून आरोपी चिद्रवारच्या ताब्यातून फिर्यादी तरुणीसह दोन्ही पीडित तरुणींची सुटका केली. पोलिस निरीक्षक खिलारे या प्रकरणाचा पुढील तपास करत आहेत.
