पुणे-कुख्यात गुंड निलेश घायवळ याच्या सख्ख्या भावाला शस्त्र परवाना देण्यात आल्याची माहिती आता समोर आली आहे. निलेश घायवळ याचा सख्खा भाऊ सचिन बन्सीलाल घायवळ याला गृहराज्यमंत्री योगेश कदम यांच्या स्वाक्षरीने शस्त्र परवाना देण्यात आल्याची मोठी माहिती समोर येत आहे. विशेष म्हणजे यापूर्वी सचिन घायवळवर अर्म्स ऍक्टनुसार गुन्हा दाखल आहे. सचिन घायवळ याला 20 जून रोजी शस्त्र परवाना देण्यात आला होता. त्याला शस्त्र परवाना देण्यास पोलिसांचा विरोध होता. पण हा विरोध डावलून त्याला शस्त्र परवाना देण्यात आल्याची धक्कादायक माहिती समोर येत आहे. सचिन घायवळ याच्यावर पुण्यात अनेक गंभीर स्वरुपाचे गुन्हे दाखल आहेत.एकनाथ शिंदेंच्या शिवसेनेत गेलेले माजी आमदार रवींद्र धंगेकर यांनी यापूर्वी भाजपचे नेते चंद्रकांत पाटील यांच्या कार्यालयात कार्यरत असलेले समीर पाटील यांचं नाव घेतलं होतं. धंगेकर यांनी समीर पाटील यांचं नाव घेत आरोप केले होते. पण त्यानंतर आता उपमुख्यमंत्री एकनाथ शिंदे यांच्या शिवसेनेचे मंत्र्याचं नाव समोर आलं आहे.
गुंड निलेश घायवळ याच्या विरोधात पुणे पोलिसांची धडाकेबाज कारवाई केली जात आहे. पुणे पोलिसांकडून निलेश घायवळच्या मालमत्तांवर छापा टाकला जात आहे. निलेश घायवळची जामखेड, अहिल्यानगर, धाराशिव येथे 40 ठिकाणी संपत्ती असल्याचं पोलीस तपासात उघड झालं आहे. याच प्रकरणात तपास करत असताना आता धक्कादायक माहिती समोर येत आहे. निलेश घायवळच्या सख्ख्या भावाला शस्त्र परवाना देण्यात आला. विशेष म्हणजे पोलिसांचा विरोध असताना हा परवाना देण्यात आल्याचं उघड झालं आहे. या संबंधित प्रतवर खुद्द गृहराज्यमंत्री योगेश कदम यांची स्वाक्षरी आहे.
