वॉशिंग्टन -संयुक्त राष्ट्र सुरक्षा परिषदेत (UNSC) काश्मीरवर खोटा प्रचार केल्याबद्दल भारताने मंगळवारी पाकिस्तानवर जोरदार टीका केली. खुल्या चर्चेदरम्यान, संयुक्त राष्ट्रांमधील भारताचे राजदूत पर्वतनेनी हरीश म्हणाले, “पाकिस्तान हा असा देश आहे जो स्वतःच्या लोकांवर बॉम्बस्फोट करतो आणि नरसंहार करतो.”हरीश म्हणाले, “जो कोणी स्वतःच्या लोकांवर बॉम्बस्फोट करतो आणि ४,००,००० महिलांवर बलात्कार करण्यासारखे अमानुष गुन्हे करतो त्याला इतरांना शिकवण्याचा अधिकार नाही. ते म्हणाले की, पाकिस्तान जगाचे लक्ष विचलित करण्यासाठी आणि दिशाभूल करण्यासाठी खोटेपणा आणि अतिशयोक्ती वापरतो.”
काश्मिरी महिलांना गेल्या अनेक दशकांपासून लैंगिक हिंसाचाराचा सामना करावा लागत असल्याचा आरोप एका पाकिस्तानी अधिकाऱ्याने केल्यानंतर हरीश यांनी हे विधान केले. जम्मू आणि काश्मीर हा भारताचा अविभाज्य भाग होता, आहे आणि नेहमीच राहील, असा पुनरुच्चार भारताने केला.
हरीश म्हणाले, “पाकिस्तान हा तोच देश आहे ज्याने १९७१ मध्ये ऑपरेशन सर्चलाइट सुरू केले आणि आपल्या सैन्याला ४,००,००० महिला नागरिकांच्या हत्याकांड आणि सामूहिक बलात्काराची पद्धतशीर मोहीम राबवण्याची परवानगी दिली.” ते पुढे म्हणाले, “जगाला पाकिस्तानचा हा खोटा प्रचार चांगलाच समजला आहे.”
१९७१ मध्ये ऑपरेशन सर्चलाइट अंतर्गत पाकिस्तानी सैन्याने पूर्व पाकिस्तानमध्ये (आता बांगलादेश) क्रूर कारवाई सुरू केली, ज्यामध्ये ३० लाख लोक मारले गेले आणि महिला नागरिकांवर बलात्कार केले गेले.
२२ सप्टेंबर रोजी, पाकिस्तानी सैन्याने पाकिस्तानातील वझिरीस्तानमधील खैबर पख्तूनख्वा येथील तिरह खोऱ्यात कोणतीही पूर्वसूचना न देता बॉम्ब टाकले. या हल्ल्यात तीस लोक ठार झाले.
स्थानिक माध्यमांच्या वृत्तानुसार, पाकिस्तानी हवाई दल या हल्ल्यांद्वारे दहशतवादी संघटना तहरीक-ए-तालिबान पाकिस्तान (टीटीपी) ला लक्ष्य करण्याचा प्रयत्न करत होते. तथापि, या हल्ल्यांमध्ये दहशतवाद्यांपेक्षा जास्त नागरिकांचा मृत्यू झाला.
गेल्या आठवड्यात भारतानेही पाकिस्तानला फटकारले. जिनेव्हा येथे झालेल्या मानवाधिकार परिषदेच्या बैठकीत भारतीय अधिकारी के.एस. मोहम्मद हुसेन म्हणाले की, पाकिस्तानचा मानवी हक्कांचा जगातील सर्वात वाईट रेकॉर्ड आहे.
ते म्हणाले, “जो देश स्वतःच्या धार्मिक आणि वांशिक अल्पसंख्याकांवर अत्याचार करतो तो इतरांना मानवी हक्कांवर व्याख्यान देऊ शकत नाही. पाकिस्तानचा खरा चेहरा आता जगासमोर आला आहे.”
