राज्यावर 9.5 लाख कोटींचे कर्ज -रोम जळत आहे आणि निरो बासरी वाजवत आहे
राज्याचे मुख्यमंत्री देवेंद्र फडणवीस यांच्या वर्षा या शासकीय बंगल्यात तब्बल 20.47 लाख रुपयांचा सोफा खरेदी करण्यात येणार असल्याची गंभीर बाब समोर आली आहे. राष्ट्रवादी काँग्रेस पार्टी शरदचंद्र पवार पक्षाचे आमदार रोहित पवार यांनी एका पोस्टद्वारे हा दावा केला आहे. राज्यावरील कर्जाचा बोजा 9.5 लाख कोटींवर गेला असताना सरकार अशी उधळपट्टी करत आहे. कदाचित मुख्यमंत्र्यांना हे माहिती नसेल, पण हे असेच सुरू राहिले तर ‘रोम जळत असताना निरो बासरी वाजवत होता’ असाच याचा अर्थ निघेल, असे त्यांनी म्हटले आहे.
मुख्यमंत्री देवेंद्र फडणवीस नुकतेच वर्षा या आपल्या शासकीय निवासस्थानी शिफ्ट झाले. त्यानंतर आता या बंगल्यात काही डागडुजी केली जात आहे. यासाठी सार्वजनिक बांधकाम विभागाच्या इलाखा शहर विभागाने एक ई-निविदा काढली आहे. त्यात मलबार हील मुंबई येथील वर्षा बंगला येथे डबल बेड मॅटर्स, सोफा व इतर कामे करण्यासाठी 20.47 लाख रुपयांची अंदाजित रक्कम ठरवण्यात आली आहे. याशिवाय इतरही काही ठिकाणच्या कामांचा उल्लेख निविदेवर आहे.
आमदार रोहित पवार यांनी एका सोफ्यासारख्या तत्सम गोष्टीवर एवढ्या मोठ्या प्रमाणात खर्च करण्यात येत असल्यावर आक्षेप घेतला आहे. ते या प्रकरणी आपल्या पोस्टमध्ये म्हणाले की, आज संपूर्ण राज्यात अतिवृष्टीने शेतकरी उध्वस्त झालेला असताना, सरकारकडे पैसे नसल्याने शेतकऱ्यांना मदत, कर्जमाफी दिली जात नसताना, राज्यावरील कर्जाचा बोझा 9.5 लाख कोटींच्या वर गेला असताना मुख्यमंत्र्यांच्या शासकीय घरी म्हणजेच वर्षा निवासस्थानी double bed matress, सोफा यासाठी 20.47 लाख रुपये तर किचन दुरुस्तीसाठी 19.53 लाख असा एकूण 40 लाखाहून अधिक पैसा खर्च केला जात असेल तर यास जनतेच्या पैशाची उतमात म्हणावं की वाढलेली महागाई?
मुख्यमंत्री यांना कदाचित हे माहित नसेल, पण हे असंच चालू राहिलं तर ‘रोम जळत आहे आणि निरो बासरी वाजवत आहे’ असाच त्याचा अर्थ निघेल… मंत्र्यांच्या घरांच्या दुरुस्तीची कामं केली पाहिजेत पण केंव्हा आणि त्यासाठी किती खर्च करावा याचाही ताळमेळ असला पाहिजे ना, असे ते म्हणाले.
