17 वर्षीय आरोपीने शाळेच्या परिसरात केला कृत्य; पोक्सो अंतर्गत गुन्हा दाखल
पुणे-शाळेतून घरी जात असलेल्या एका 13 वर्षीय मुलाला रस्त्यात अडवून त्याच्या ओळखीतील एका अल्पवयीन मुलाने लैंगिक अत्याचार केल्याची धक्कादायक घटना उघडकीस आली आहे. या प्रकरणी एका 17 वर्षीय अल्पवयीन मुलांविरुद्ध बाणेर पोलिसांनी गुन्हा दाखल केला आहे.
याबाबत पीडित मुलाच्या आईने बाणेर पोलीस ठाण्यात आरोपी विरोधात फिर्याद दिली आहे. त्यांनी दिलेल्या तक्रारीनुसार, अल्पवयीन आरोपी विरुद्ध बालकांचे लैंगिक अत्याचारांपासून संरक्षण कायद्यान्वये (पोक्सो) गुन्हा दाखल करण्यात आला आहे. पोलिसांनी दिलेल्या माहितीनुसार, पीडित 13 वर्षीय मुलगा 11 सप्टेंबर रोजी दुपारी साडेचार वाजण्याच्या सुमारास शाळेतून घरी निघाला होता.
त्यावेळी आरोपी अल्पवयीनाने त्याला रस्त्यातच अडवले. खेळायला जाऊ असा बहाणा केला. त्यानंतर मुलाला शाळेच्या परिसरात एका झाडाजवळ नेऊन त्याला पैसे देण्याचे आमिष दाखविले. मुलावर त्याने बळजबरीने लैंगिक अत्याचार करण्याचा प्रयत्न केला. मुलाने त्याला विरोध केल्यानंतर त्याला जीवे मारण्याची धमकी देऊन त्याच्यावर अत्याचार करण्यात आल्याचे तक्रारीत सांगण्यात आहे. पोलिस उपनिरीक्षक एस सानप पुढील तपास करत आहेत.
अल्पवयीन मुलीचा विनयभंग प्रकरणी गुन्हा
कॉलेज वरून घरी जात असताना अल्पवयीन मुलीची बॅग व मोबाईल हिसकावत घेऊन तिचा विनयभंग केल्याप्रकरणी एकावर बिबवेवाडी पोलिस ठाण्यात गुन्हा दाखल करण्यात आला आहे. आकाश चंद्रकांत जगताप (25, रा. चैत्र बन वसाहत, बिबवेवाडी) याच्यावर बाल लैंगिक अत्याचार व विविध कलमान्वये गुन्हा दाखल करण्यात आला आहे.याप्रकरणी एका 17 वर्षीय मुलीने बिबवेवाडी पोलिस ठाण्यात आरोपी विरोधात तक्रार दिली आहे.
महिलेला फिरायला जाऊ म्हणत विनयभंग
महिलेला फिरायला जाऊ म्हणत कॉल करून मनास लज्जा उत्पन्न होईल असे वर्तन केल्याप्रकरणी फुरसुंगी पोलिस ठाण्यात एका विरोधात गुन्हा दाखल करण्यात आला आहे. गौतम लोणे (40, रा. हिंदवीनगर, उरूळी देवाची) असे गुन्हा दाखल करण्यात आलेल्याचे नाव आहे. याबाबत एका 38 वर्षीय महिलेनी तक्रार दिली आहे. आरोपीने फिर्यादी महिलेच्या मोबाईल वर कॉल करून चला आपण फिरायला जाऊया म्हणून जवळीक साधण्याचा प्रयत्न केल्याचे तक्रारीत सांगितले आहे.
