प्राचार्य डॉ.सुधाकरराव जाधवर कला, वाणिज्य व विज्ञान महाविद्यालयाच्यावतीने आयोजन
पुणे : युवा पिढीतील सुप्त कलागुणांना वाव देण्याकरीता पुण्यामध्ये प्राचार्य डॉ.सुधाकरराव जाधवर कला, वाणिज्य व विज्ञान महाविद्यालय, सावित्रीबाई फुले पुणे विद्यापीठ पुणे, सृजनसभा पुणे यांच्या संयुक्त विद्यमाने ७ वा प्राचार्य डॉ.सुधाकरराव जाधवर करंडक राज्यस्तरीय आंतरमहाविद्यालयीन स्पर्धेचे आयोजन करण्यात आले आहे. दिनांक २१ ते २३ आॅगस्ट दरम्यान न-हे मानाजीनगर येथील संस्थेच्या संकुलात स्पर्धा होणार आहे. वक्तृत्व, लोकगीत गायन, वादविवाद, पथनाटय, छोटा ख्याल गायन, नाटयगीत गायन व एकल तबला वादन या प्रकारांत ही स्पर्धा घेण्यात येणार आहे, अशी माहिती संस्थेचे उपाध्यक्ष अॅड.शार्दुल जाधवर यांनी पत्रकार परिषदेत दिली.
स्पर्धेचे उद््घाटन गुरुवार, दिनांक २१ आॅगस्ट रोजी सकाळी १० वाजता होणार आहे. उद्घाटनानंतर वक्तृत्व स्पर्धा होणार असून भारत विश्वगुरु होणार, वंदे मातरम् राष्ट्रीय गीत, तिसरे महायुद्ध? असे विषय आहेत. तर, लोकगीत गायन स्पर्धेत भारुड, भजन, पोवाडा सादरीकरण देखील याच दिवशी होणार आहे. तसेच स्व. आमदार रमेशभाऊ वांजळे निबंधलेखन स्पर्धा व कै. उद्धवराव तुळशीराम जाधवर वक्तृत्व स्पर्धा ही १ ली ते १२ वी च्या विद्यार्थ्यांकरिता आयोजित करण्यात आली आहे.
अॅड. शार्दुल जाधवर म्हणाले, वादविवाद व पथनाटय स्पर्धा शुक्रवार, दिनांक २२ आॅगस्ट रोजी सकाळी १० पासून सुरु होणार आहेत. वादविवाद स्पर्धेकरीता आणीबाणी योग्य की अयोग्य?, धार्मिक कट्टरता आणि पेहेलगाम हे विषय असणार आहेत. तसेच पथनाटय स्पर्धेकरीता मतदान माझा हक्क आणि कर्तव्य या विषयावर सादरीकरण करण्याची मुभा स्पर्धकांना असणार आहे. तसेच, शनिवार, दिनांक २३ आॅगस्ट रोजी सकाळी १० वाजता छोटा ख्याल गायन, नाटयगीत गायन व एकल तबला वादन स्पर्धा होईल.
सर्व स्पर्धा प्रकारांतील प्रथम विज्येत्याला १५ हजार ५५५ रुपये, द्वितीय क्रमांकाला ११ हजार १११ रुपये, तृतीय क्रमांकाला ७ हजार ७७७ रुपये व चषक आणि उत्तेजनार्थ क्रमांक पटकाविणा-या रुपये ११११ व चषक प्रदान करण्यात येणार आहे. स्पर्धेमध्ये पुण्यासह कोल्हापूर, कोकण, उत्तर महाराष्ट्र, विदर्भ आदी शहरांतील संघांनी सहभागी होणार असून नोंदणी सुरु आहे. स्पर्धेचा पारितोषिक वितरण समारंभ शनिवार, दिनांक १३ सप्टेंबर रोजी महाविद्यालयात होणार आहे. स्पर्धेत सहभागाकरिता ७९७२४८३५७५, ९९२३५३७४३६, ९११२४४५२८४ , ९२८४३८३१२५ या क्रमांकावर संपर्क साधण्याचे आवाहन संस्थेतर्फे करण्यात आले आहे.
