हिमाचल प्रदेशात गेल्या दोन दिवसांपासून सुरू असलेल्या मुसळधार पावसामुळे सामान्य जनजीवन विस्कळीत झाले आहे. बुधवारी रात्री १०:१५ वाजता शिमला जिल्ह्यात ढगफुटी झाली. त्यामुळे नोगली नाल्याला पाणी आले.
बुधवारी, मंडीतील दवाडा येथील चंदीगड-मनाली चौपदरी उड्डाणपुलावर भूस्खलनामुळे भेगा पडल्या. राज्यातील मंडी-मनाली आणि चंदीगड-शिमला चौपदरी रस्त्यांसह ५३३ रस्ते बंद करण्यात आले आहेत.
उत्तर प्रदेशात सततच्या पावसामुळे नद्या दुथडी भरून वाहत आहेत. प्रयागराज, वाराणसीसह २४ जिल्ह्यांमधील १,२४५ गावे पुराच्या विळख्यात सापडली आहेत. आतापर्यंत पावसामुळे ३६० घरे कोसळली आहेत. गेल्या २ दिवसांत पूर आणि पावसाशी संबंधित अपघातांमध्ये १६ जणांचा मृत्यू झाला आहे.
बुधवारी, फर्रुखाबादच्या पंखियान गावातील एक घर १० सेकंदात गंगा नदीत बुडाले. लखीमपूर खेरी येथे शारदा नदीला पूर आला आहे. अयोध्येतील सरयू नदीची पाण्याची पातळी धोक्याच्या पातळीपेक्षा २ सेमी वर पोहोचली आहे. ४८ गावांमध्ये पुराचा धोका आहे.
बिहारमध्ये गंगा आणि सोन नद्या दुथडी भरून वाहत आहेत. राज्यातील अनेक गावे पाण्याखाली गेली आहेत. पाटण्यात गंगा धोक्याच्या पातळीच्या जवळ पोहोचली आहे. पाटणा शहरातील भद्रघाट आणि महावीर घाटातील सर्व्हिस लेनवर गंगेचे पाणी २ फुटांपर्यंत पोहोचले आहे.
