सर्व स्तरांतील महिलांना उच्च दर्जाची आणि समतोल उपचार सेवा देण्यासाठी उपक्रम
मुंबई, 4 ऑगस्ट 2025 – सिटिअसटेक ही आरोग्य तंत्रज्ञान, सेवा आणि उपाययोजना पुरविणारी आघाडीची कंपनी असून, महाराष्ट्र शासनाच्या कामा आणि अॅलब्लेस रुग्णालयाच्या सहकार्याने महिलांच्या युरोगायनकोलॉजी विभागाचे नूतनीकरण व एक अत्याधुनिक, आंतरराष्ट्रीय दर्जाचे उत्कृष्टता केंद्र उभारण्याच्या उपक्रमात सहभागी झाली आहे. हा विभाग भारताच्या सार्वजनिक आरोग्य प्रणालीमध्ये महिलांच्या पेल्विक फ्लोअर (कमीशा भागातील स्नायूंचे आरोग्य) उपचाराच्या दिशेने एक महत्त्वपूर्ण पाऊल ठरतो. या युरोगायनकोलॉजी विभागात महाराष्ट्र आरोग्य विज्ञान विद्यापीठाच्या (MUHS) मान्यतेने विद्यापीठ-संलग्न फेलोशिप कार्यक्रम सुरू करण्यात आला असून, या क्षेत्रातील भावी तज्ज्ञांचे प्रशिक्षण देण्यात येणार आहे. सिटिअसटेकने डॉ.अपर्णा हेगडे आणि अर्मन (ARMMAN) यांच्या सहकार्याने कॉर्पोरेट सोशल रिस्पॉन्सिबिलिटी (CSR) उपक्रमांतर्गत या प्रयत्नाला पाठबळ दिले असून, तंत्रज्ञान-सक्षम, सर्वांना सुलभ अशा आरोग्यसेवेला प्रोत्साहन देण्याची कंपनीची बांधिलकी यामधून अधोरेखित होते.
सिटिअसटेकच्या CISO आणि CSR व सस्टेनेबिलिटी प्रमुख पूनम शेजाळे म्हणाल्या, “भारतातील एक तृतीयांश महिलांना त्यांच्या आयुष्यात कधी ना कधी युरोगायनकोलॉजीसंबंधी समस्या येतात. या समस्या अनेकदा निदर्शनासही येत नाहीत. सिटिअसटेकच्या सखोल तांत्रिक ज्ञानाची सांगड डॉ.तुषार पालवे आणि डॉ.अपर्णा हेगडे यांच्या चिकित्सकीय व सामाजिक दृष्टिकोनाशी घालून आम्ही असे सार्वजनिक आरोग्यसेवा केंद्र उभं करत आहोत, जे सर्व स्तरांतील महिलांना उच्च दर्जाची आणि समतोल उपचार सेवा प्रदान करेल.”
कामा आणि अॅलब्लेस रुग्णालयाचे वैद्यकीय अधीक्षक व शासकीय वैद्यकीय महाविद्यालयाचे उप अधिष्ठाता डॉ.तुषार पालवे म्हणाले, “कामा रुग्णालयासोबत भागीदारी करत सिटिअसटेकने अत्याधुनिक केंद्र स्थापन केल्याबद्दल आम्ही त्यांच्या ऋणी आहोत. हे केंद्र सर्वात दुर्बल गटातील रुग्णांपर्यंत सेवा पोहोचवेल. अशी सकारात्मक भूमिका घेणाऱ्या कॉर्पोरेट्सची संख्या वाढावी, अशी आमची आशा आहे.”
हे दोन मजली केंद्र भारतातील सर्वात प्रगत युरोगायनकोलॉजी केंद्रांपैकी एक आहे. तळमजल्यावर सहा क्लिनिक खोल्यांसह जागतिक दर्जाचा बाह्यरुग्ण विभाग आहे, तर पहिल्या मजल्यावर अत्याधुनिक निदान केंद्र आहे. येथे व्हिडीओ-युरोडायनॅमिक्स, ब्लूटूथ-सक्षम युरोफ्लोमेट्री, 2D/3D पेल्विक फ्लोअर अल्ट्रासाउंड, अँडोअनल अल्ट्रासाउंड, एनोरेक्टल मॅनोमेट्री, फ्लुरो-डिफेकोग्राफी, ऑफिस सीस्टोस्कोपी, लेझर आणि युरोस्टिम पेल्विक फ्लोअर थेरपी युनिट यांसारखी प्रगत उपकरणे उपलब्ध आहेत. ही सर्व उपकरणे आणि सुविधा एकत्रितपणे हे केंद्र भारतातील सर्वात अत्याधुनिक युरोगायनकोलॉजी केंद्र बनवितात.
“माझं स्वप्न होतं की, दर्जेदार उपचार सर्वांना, त्यांच्या सामाजिक-आर्थिक पार्श्वभूमीकडे न पाहता, सन्मान आणि गोपनीयतेच्या अधिष्ठानावर मिळावेत. हे स्वप्न प्रत्यक्षात आणण्यासाठी मी अमेरिका सोडली. या विभागात देशातील बहुतांश रुग्णालयांमध्ये नसलेली उच्च दर्जाची निदान सुविधा आणि उपकरणं उपलब्ध आहेत. हे केंद्र केवळ उत्कृष्ट उपचारांसाठीच नाही, तर अत्याधुनिक संशोधन व प्रगत प्रशिक्षणासाठी एक केंद्रबिंदू म्हणून विकसित करणे हे आमचं ध्येय आहे. आमचा उद्देश आहे, अशी एक नवी पिढी तयार करणे, जी जागतिक दर्जाच्या प्रशिक्षणाने सज्ज असेल आणि भारतभर या क्षेत्रात सकारात्मक बदल घडवेल,” असं डॉ.अपर्णा हेगडे, सन्माननीय सहप्राध्यापिका, युरोगायनकोलॉजी विभाग, कामा आणि अॅलब्लेस रुग्णालय, तसेच ARMMAN संस्थेच्या संस्थापिका म्हणाल्या.
सिटिअसटेकचे प्रमुख, प्रशासन, खरेदी, इमिग्रेशन व प्रवास विभाग, मनोज बळवाणी म्हणाले, “सिटिअसटेक अनेक अर्थपूर्ण उपक्रमांना पाठिंबा देते, पण हा उपक्रम आमची तांत्रिक नवकल्पना या पलीकडे जाऊन समाजाप्रती असलेली व्यापक बांधिलकी स्पष्टपणे दाखवितो. आम्ही केवळ निधीच नव्हे, तर आमचे डिझाइन, तांत्रिक कौशल्य आणि खरेदी प्रक्रियेतील अनुभव यांचाही उपयोग करून जागतिक दर्जाचं, टिकाऊ आरोग्यसेवेचं वातावरण निर्माण करण्यात योगदान दिलं. या माध्यमातून आम्ही केवळ वैद्यकीय क्षेत्रापुरते मर्यादित न राहता, सन्मान, काळजी आणि दीर्घकालीन परिणामकारकता यांचा मूल्याधारित प्रसार करण्याचा प्रयत्न करत आहोत.
कामा आणि अॅलब्लेस रुग्णालयातील देशातील पहिल्या युरोगायनकोलॉजी विभागाची संकल्पना आणि स्थापना प्रसिद्ध युरोगायनकोलॉजिस्ट व ARMMAN या स्वयंसेवी संस्थेच्या संस्थापिका डॉ.अपर्णा हेगडे मांडली आहे. 2018 मध्ये त्यांनी महाराष्ट्र शासनाच्या वैद्यकीय शिक्षण विभागासोबत एक सामंजस्य करार (MoU) केला होता, ज्या अंतर्गत या विभागाचा विकास केला जाणार होता. हा प्रस्ताव 2023 मध्ये शासनाकडून मंजूर करण्यात आला. हे केंद्र पेल्विक फ्लोअरशी संबंधित विकारांचे निदान व उपचार करण्याच्या उद्देशाने स्थापन करण्यात आले आहे. यात पेल्विक ऑर्गन प्रोलॅप्स, लघवीचे अपघाताने होणारे स्रवण (urinary incontinence), मलावरोध, भगंदर, मूत्र विसर्जनातील बिघाड (dysfunctional voiding), प्रसूतीनंतरचे पेरिनियल इजा, लघवीच्या संक्रमणांचा त्रास, मूत्राशयातील वेदना (bladder pain syndrome), बद्धकोष्ठता (constipation) इत्यादी विकारांचा समावेश होतो. हे विकार भारतातील जवळपास प्रत्येक चारपैकी एका महिलेवर परिणाम करतात, पण बहुतेक वेळा योग्य निदान व उपचार न मिळाल्यामुळे दुर्लक्षित राहतात. रुग्णांच्या गोपनीयतेस, सहवेदनेला आणि वैद्यकीय उत्कृष्टतेला प्राधान्य देऊन डिझाइन केलेले हे केंद्र जागतिक दर्जाच्या प्रशिक्षण व संशोधनासाठीही एक महत्त्वपूर्ण व्यासपीठ ठरणार आहे.
हे केंद्र म्हणजे शासन, आरोग्यसेवा प्रदाते, खासगी क्षेत्र आणि शैक्षणिक संस्था यांच्यातील सहकार्याचे एक उत्कृष्ट उदाहरण आहे. देशभरात महिलांच्या विशेष आरोग्यसेवांचा समतोल आणि व्यापक प्रवेश वाढविण्यासाठी हे एक विस्तारक्षम मॉडेल ठरू शकते.
