पुणे :खडसे यांचे जावई आणि रोहिणी खडसेंचे पती प्रांजल खेवलकर यांच्यासह ७ जणांना पुणे पोलिसांनी रेव्ह पार्टी प्रकरणी अटक केलीय. त्यांना दोन दिवसांची पोलीस कोठडी सुनावलीय. दरम्यान, या प्रकरणी खडसे कुटुंबियांनी खेवलकर यांना अडकवण्याचं षडयंत्र असल्याचा आरोप केला आहे.आता या प्रकरणावर वकील असीम सरोदे यांनी म्हटलं की, पोलिसांनी खेवलकर यांच्या खासगी जीवन जगण्याच्या अधिकाराचं उल्लंघन केलंय.
पुणे पोलिसांनी कोकेन, गांजाचे पुरावे प्लांट केले. पार्टी करणाऱ्या लोकांना समाजापुढे आरोपी असल्याचं दाखवण्यासाठी चित्र उभा केलं. त्यांचा व्हिडीओसुद्धा व्हायरल केला. यामुळे हे प्रकरण उच्च न्यायालयात जाण्याची शक्यता असून पुणे पोलिसांच्या अडचणी वाढू शकतात असा दावाही सरोदे यांनी केलाय.
खडसेंचे जावई प्रांजल खेवलकर यांच्यासह पुणे पोलिसांनी सात जणांना अटक केलीय. या प्रकरणात पोलिसांनी राजकीय उद्देश ठेवून दृश्यम चित्रपटासारखं खोटं चित्र रंगवलंय. घरात दारू पिणं गुन्हा नाही. पण पोलिसांनी या प्रकरणाला रेव्ह पार्टीचं स्वरुप दिलं असल्याचंही सरोदे यांनी म्हटलं.
रेव्ह पार्टी वेगळी असते. तिथं मोठ्या आाजात संगीत, मोठ्या प्रमाणावर लोक, तोकडे कपडे, अफू, गांजा, नशिले पदार्थ यांचा समावेश असतो. पुणे पोलिसांनी कारवाई केली ते प्रकरण वेगळं आहे. एका ठिकाणी ते दारू, बिअर पित होते असं असीम सरोदे म्हणाले.
खेवलकर आणि इतरांना गुन्हेगार ठरवण्यासाठी पुरावे पेरण्यात आले आहेत. पुणे पोलिसांनीच हे कटकारस्थान रचलंय. पोलिसांनी दोन ग्रॅम कोकेन सापडल्याचा दावा केला. पण ७ मिलीग्रॅम कोकेन जास्त भरलं पाहिजे अशी व्यवस्था करत बेल न मिळण्यासाठी स्थिती निर्माण केली. पोलिसांनी एक चित्र निर्माण केलं. न्यायालयात जाण्याआधीच एक व्हिडीओ व्हायरल केला. पोलिसांना ही चूक भोवणार आहे असाही दावा असिम सरोदे यांनी केला.
