विविध क्षेत्रात अति उत्कृष्ट कार्य करणाऱ्या माजी सैनिक,पत्नी,पाल्य यांना विशेष गौरव पुरस्कार

पुणे दि. 22 :- विविध क्षेत्रात अति उत्कृष्ट कार्य करणाऱ्या माजी सैनिक, पत्नी, पाल्य यांना एकरकमी विशेष गौरव पुरस्कार देण्यात येणार असल्याचे जिल्हा सैनिक कल्याण अधिकारी, पुणे यांनी कळविले आहे.
खेळ, साहित्य, संगीत, गायन, वादन, नृत्य तसेच नैसर्गिक आपत्तीमध्ये बहुमोल कामगिरी, शैक्षणिक क्षेत्रात उत्कृष्ट कामगिरी करून पुरस्कार प्राप्त केलेले, सन 2024-2025 मध्ये इयत्ता 10 वी बोर्डाच्या परीक्षेत 90 टक्के व 12 वी बोर्डाच्या परीक्षेत 85 टक्के पेक्षा जास्त गुण मिळवून उत्तीर्ण झालेले, पदवी किंवा पदव्युत्तर परीक्षेत विद्यापीठात सर्वप्रथम क्रमांकाने उत्तीर्ण झालेले, आयआयटी, आयआयएम, एआयआयएमएस अशा नामवंत व ख्यातीप्राप्त संस्थामध्ये प्रवेश मिळविणारे, यशस्वी उद्योजक पुरस्कार मिळविणारे, सामाजिक कार्य आणि पर्यावरणविषयक पुरस्कार मिळविणारे सर्व माजी सैनिक पत्नी, पाल्य या पुरस्कारासाठी पात्र असतील.
विशेष गौरव पुरस्कार मिळणेबाबतचा विहित नमुन्यातील अर्ज जिल्हा सैनिक कल्याण कार्यालयात उपलब्ध असून संबंधित माजी सैनिक/माजी सैनिक विधवा यांनी त्यांचे अर्ज 15 सप्टेंबर 2025 रोजी सकाळी 10.00 वाजेपर्यंत सर्व कागदपत्रासह जिल्हा सैनिक कार्यालय, पुणे येथे सादर करावेत असे, आवाहन जिल्हा सैनिक कल्याण अधिकारी, पुणे लेफ्टनंट कर्नल हंगे स. दै. ( नि.) यांनी प्रसिध्दी पत्रकान्वये केले आहे.