मुंबई-भाजप नेते तथा मंत्री गिरीश महाजन यांनी राष्ट्रवादी काँग्रेस शरदचंद्र पवार पक्षाचे आमदार एकनाथ खडसे यांच्यावर जोरदार पलटवार केला आहे. या प्रकरणी त्यांनी हनी ट्रॅपचे आरोप असणाऱ्या प्रफुल्ल लोढाचा दाखला देत खडसेंवर त्यांच्या मुलाला संपवल्याचा आरोप केला आहे. एकनाथ खडसे यांनीच आपल्या मुलाचा खून केला असे याच लोढाने सांगितले होते, असे ते म्हणालेत.एकनाथ खडसे यांनी सोमवारी हनीट्रॅप प्रकरणाची एसआयटी चौकशी करण्याची मागणी केली होती. जळगावच्या प्रफुल्ल लोढा नामक एका व्यक्तीकडे हनी ट्रॅपची संपूर्ण माहिती आहे. स्थानिक पोलिसांकडून या प्रकरणाची पारदर्शक चौकशी होऊ शकत नाही. त्यामुळे त्याची एसआयटी चौकशी झाली पाहिजे, असे ते म्हणाले होते. त्यांच्या या विधानानंतर गिरीश महाजन यांनी एका पत्रकार परिषदेद्वारे त्यांच्यावर निशाणा साधला आहे.
गिरीश महाजन म्हणाले की, एकनाथ खडसे यांच्याविषयी काय बोलावे? त्यांना सर्वदूर अपयश आले आहे. ते सत्तेपासून दूर फेकले गेलेत. भाजपमध्ये येण्यासाठी त्यांनी लोटांगण घातले. पण कुणीही त्यांना पक्षात घेतले नाही. आजारपण व सर्वदूर अपयश यामुळे ते द्वेषभावनेने पछाडले गेलेत. त्यांची मानसिकताच खराब झाली आहे. मी प्रफुल्ल लोढा यांचा खडसेंसोबतचाही एक फोटो दाखवतो.
एकनाथ खडसे यांचे सुपुत्र निखील खडसे यांनी आत्महत्या केली होती. त्यावेळी हाच प्रफुल्ल लोढा काय बोलला होता? काय – काय बरळला होता? आता खडसे म्हणतात लोढाची एसआयटी चौकशी करा. असे असेल तर या लोढाने निखील खडसे यांच्या मृत्यू प्रकरणाची चौकशी करण्याचीही मागणी केली होती. एकनाथ खडसे यांच्या मुलाचा मृत्यू नेमका कशामुळे झाला हे समोर आले पाहिजे. खडसेंनीच त्यांच्या मुलाचा खून केला असे याच लोढाने सांगितले होते. त्यावेळी मी खडसेंसोबत होतो. मला त्यावर भाष्य करायचे नाही. मी त्या लेव्हलचा माणूसही नाही. पण त्यांनी बोलताना थोडे तारतम्य बाळगले पाहिजे, असे गिरीश महाजन म्हणाले
प्रफुल्ल लोढाने काय केला होता दावा? गिरीश महाजन यांनी प्रफुल्ल लोढाचा एक जुना व्हिडिओ समोर आणला आहे. या व्हिडिओत प्रफुल्ल लोढा म्हणतो, माझा मित्र स्वर्गीय निखील भाऊ खडसे याने आत्महत्या केली. परंतु मला शंका आहे की, त्याच्या व्यसनामुळे एकनाथ खडसे यांची बदनामी होत होती. म्हणून या निखीलने आत्महत्या केली की, काही काळबेरे एकनाथ खडसेंनी केले? याची चौकशी होण्याची गरज आहे. मी या प्रकरणी न्यायालय, मुख्यमंत्री, विरोधी पक्ष नेते, शरद पवार, राष्ट्रपती, राज्यपाल या सर्वांकडे मागणी करणार आहे.
निखील खडसेंनी केव्हा केली होती आत्महत्या? एकनाथ खडसे यांचे सुपुत्र निखील खडसे यांनी 1 मे 2013 रोजी स्वतःच्या डोक्यात गोळी घालून आत्महत्या केली होती. जळगाव जिल्ह्यातील मुक्ताईनगर येथील त्यांच्या राहत्या घरी ही घटना घडली होती. यामुळे राज्यात एकच खळबळ माजली होती. निखील खडसे यांनी विधानपरिषेदची निवडणूक लढवली होती, पण त्यात त्यांचा पराभव झाला होता. त्यांनी जिल्हा परिषद सदस्य म्हणून केले होते.
