नवऱ्याला नोकरी लावण्याचे आमिष दाखवून बालेवाडी येथील हॉटेलमध्ये बलात्कार, लोढावर मुंबईत अत्याचार प्रकरणी गुन्हा दाखल
पुणे-‘हनी ट्रॅप’ प्रकरणामुळे आधीच चर्चेत आलेल्या प्रफुल्ल लोढाविरुद्ध पुण्यातील बावधन पोलिस ठाण्यात बलात्काराचा आणखी एक गुन्हा दाखल करण्यात आला आहे. कोथरूड परिसरात राहणाऱ्या एका 36 वर्षीय विवाहित महिलेने या प्रकरणी तक्रार दाखल केली आहे. प्रफुल्ल लोढाने माझ्या नवऱ्याला नोकरी लावण्याचे आमिष दाखवून आपल्यासोबत जबरदस्तीने शारिरीक संबंध ठेवले, असा आरोप या महिलेने केला आहे. ही घटना 27 मे 2025 रोजी रात्री 8च्या सुमारास बालेवाडी येथील पुणे – बंगळुरू महामार्गालगत असलेल्या एका हॉटेलमध्ये घडल्याचे महिलेने दिलेल्या तक्रारीत म्हटले आहे.
यासंबंधी मिळालेल्या माहितीनुसार, संशयित प्रफुल्ल लोढा याने पीडित महिलेस पतीला नोकरी लावतो, असे सांगून 27 मे 2025 रोजी रात्री आठ वाजता बालेवाडी येथील हॉटेलमध्ये बोलावले. पतीला नोकरी लावायची असेल तर त्याबदल्यात शरीरसंबंध ठेवू दे, अशी मागणी केली. महिलेने याला नकार दिला, तेव्हा “तुझीही नोकरी घालवतो,” अशी धमकी देत जबरदस्तीने पीडिताशी शारीरिक संबंध प्रस्थापित केले. या प्रकरणी पीडित महिलेने 17 जुलै रोजी बावधन पोलिस ठाणे गाठून फिर्याद दाखल केली. सध्या या प्रकरणाचा तपास सुरू आहे.
या घटनेच्या काही दिवस आधीच प्रफुल्ल लोढाविरुद्ध मुंबईतील अंधेरी एमआयडीसी आणि साकीनाका पोलिस ठाण्यांमध्ये दोन गंभीर गुन्हे दाखल झाले होते. दोन्ही घटनांमध्ये नोकरीचं आमिष दाखवून 16 वर्षीय अल्पवयीन मुलीवर आणि तिच्या मैत्रिणीवर लैंगिक अत्याचार, धमकी, डांबून ठेवणे, आणि अश्लील फोटो काढण्याचे गंभीर आरोप आहेत.
साकीनाका पोलिस ठाण्यात 3 जुलै रोजी लोढावर ‘पोस्को कायदा’, बलात्कार, खंडणी आणि फसवणुकीचे कलमांखाली गुन्हा दाखल करण्यात आला होता. या प्रकरणात 5 जुलै रोजी त्याला अटक करण्यात आली. यानंतर 14 जुलै रोजी अंधेरी एमआयडीसी पोलिस ठाण्यात ‘हनी ट्रॅप’सह ‘पोस्को’ कायद्याअंतर्गत आणखी एक गुन्हा दाखल करण्यात आला.
